Na Hulanda tin varios dicho cu ta contene e palabra ‘snor’, y ta interesante pa observa con e famoso ekipo di domino, Team Snor bou guia di e flamante Nelson ‘Snor’ Perez, ta cumpli, consciente o inconsciente, na cierto di e dichonan aki.
Ban cuminsa por ehempel cu Team Snor nan uniform: na Hulandes nos por bisa dat zit snor; locual kiermen dat is in orde, ta mustra bon, na ordo, done! Un uniform unico y custom made c’un caricatura di cada doño dje uniform riba dje. En general por opina mescos dje wega di Team Snor, ya cu mayoria biaha nan ta gana nan batayanan, y ora perde mes, nan ta perde cu score minimo. Dus, dat zit ook snor.
Pero tin mas. Recientemente tabata tin varios caso caminda ora presion bira di mas, por ehempel ora e score ta 20 – 20, varios integrante di Team Snor, pa no bisa mayoria, diripiente a haya un atake di ‘de kleine boodschap’ y a huy masalmente pa baño y keda kampeer eyden te ora e tormenta pasa. Na bon Hulandes nos ta bisa ‘zijn snor drukken’, of na bon Papiamento ‘bula pipa’, keda sin haci bo trabou, haya miedo y core pa responsabilidad. Otro caso di un dicho Hulandes cu ta cuadra, consciente o inconscientemente, cu sucesonan di Team Snor.
Un otro caso cu sa pasa ta cu tin ora tin cambio di pitcher ya cu e capitan tin un caso di locual na Hulandes nan ta bisa ‘een snor aan hebben’, locual kiermen cu a dal dos slok di mas y ya no a worry mucho mas kico bin of kico bay. Ey ta caminda ta shuffle e team di nobo pa drecha resultado y caminda un otro dicho Hulandes a drenta wega: een goeie poes heeft altijd een natte snor; locual kiermen uza un cos segun a traha p’e.
Den otro palabra, pone bon hungado caminda planchi ta na candela. Y esaki tabata exactamente locual a bolbe pasa durante e bataya di diasabra 24 di juni entre Team Snor contra Team Bou Dak. Aunke Team Snor tabata gana caba na halftime cu 11 – 7, a dicidi di no tuma ningun riesgo mas. Captain Magda a tuma timon over y a haci cierto cambio cu a causa Team Snor ranca cu velocidad y caba cos cu score impactante di 21 – 11!
Bou Dak a keda huma so di San Juan … Next! Coming Soon … Keda pendiente, pasobra e siguiente wega grandi lo ta contra Team Bou Palo.
