E resultado final di e votacion ayera nochi a cay di sorpresa pa mayoria parlamentario den sala di parlamento. Mayoria no a premira cu tanto parlamentario di MEP lo cambia di opinion di pro pa contra y sigur no a imagina cu Shailiny Lee, cu tabata pro, lo opta pa abstene ora di vota. Ta door di e abstencion aki mes a causa cu e votacion a empata cu consecuencia cu e ley no a pasa.
Te cu prome cu e reunion, a anticipa cu e resultado lo ta 13-8 na fabor di e ley. Tabata conoci cu AVP tabata dividi 2 contra y 3 na fabor. Pero MEP tabata parce 5 contra y 4 na fabor.
Ey a bin e cambio drastico ora di votamento, pasobra a resulta cu un solo miembro di MEP, Setty Yarzagaray, a vota na fabor. Shete miembro di MEP a vota contra y un miembro, Lee, a abstene di vota. Cu esey el a manda un mensahe cu e no ta sigur si e ta pro of contra, a opta pa keda neutral.
Setty Yarzagaray a tene un discurso masha emocional den sala di parlamento, argumentando dicon e ta na fabor. El a describi locual el a biba den cas di su mayornan, cu no por a acepta cu su ruman tabata homosexual. El a hasta yora den sala, pa cual su colega Hendrik Tevreden mester a consol’e. E consolacion sinembargo tabata djis pa e emocion pasobra niun colega a sosten’e den su voto y a laga su so para.
E realidad ta cu tanto partido MEP como AVP tin problema pa pasa e ley aki. Siendo partidonan grandi y cu historia, nan tin pa atende cu nan achterban, cu den su mayoria ta adultonan mayor, cu no ta na fabor di e cambio di ley.
Tabata conoci desde principio cu ambos partido lo haci tur loke ta den nan alcanse pa e ley aki no pasa. AVP a hay’e cu un reto grandi interno tempo di nan gobernacion cu e ley aki y cu finalmente e nunca a pasa tampoco. MEP tambe a purba rek e discusion pero a hay’e bou presion di Raiz, cu a pone pia’bou pa trata e ley den parlamento.
Locual a sosode ayera ta cu a trata e ley, a complace cu Raiz, cu ta co-iniciado di e ley hunto cu Accion 21 y MAS pero no a sosten’e. Di e nuebe asientonan di MEP, ta un so a sostene e ley aki. AVP por ehempel a sostene e ley mas cu MEP mes!
Si esaki lo tin consecuencia politico, nos lo mira den e siguiente dianan. Raiz a manda varios mensahe di adelanta caba cu si e ley no pasa, cu e ora MEP lo tin cu enfrenta e pueblo. Por sinti internamente tambe cu peleanan personal no a yuda den e harmonia cu mester ta existi entre e dos partidonan di coalicion, pa por tin un mayoria pa pasa e ley.
Edgard Vrolijk por ehempel tabata pro e ley na un principio, pero ora el a pega cu Misha Raymond, kende a mand’e un carta basta fuerte, el a rabia y cambia di opinion tambe. Kisas e no tin problema cu e ley pero djis no kier sosten’e pasobra Misha Raymond ta su tras.
Reunion den coalicion lo ta otro siman probablemente pasobra Evelyn Wever-Croes, memey di e debate den parlamento, a subi avion cu su tata y su casa pa bay vakantie na Miami, pa pasa long-weekend. Probablemente ora puntra su opinion otro siman e lo contesta di no sa di nada atrobe.
Ursell Arends awo lo tin cu calma su dos parlamentarionan den parlamento, cu lo no keda man crusa despues di e empata di nan ley y probablemente lo no sostene otro leynan inicia pa MEP tampoco, cu por bira e ora “the beginning of the end”.
