Recientemente a tuma luga e penultimo dia di estudio pa cabesante di scol y maestro di klas 1 di scol basico. DEA a inicia cu un trayecto di preparacion pa cabesante di scol basico y nan maestronan di klas 1 na november 2023. E prome sesion informativo a cuminsa dia 17 di november 2023 na unda a comparti informacion, a conecta cu otro y a crea diferente Comunidad Profesional di Siñamento (CPS).
En total a forma ocho CPS na unda cada CPS lo enfoca riba un of mas topico pa profundisa nan mes aden. Cada CPS por a enfoca riba diferente area specifico cu ta di mayor importancia pa e grupo nucleo di e CPS. Unda un grupo a scoge pa enfoca y profundisa nan mes p.e. riba haci un estudio mas profundo di e materia, un otro CPS a enfoca riba crea material pa sostene e metodo y un otro a enfoca riba crea plan di comunicacion pa informa mayor.
Na comienso di 2024 a reuni mensualmente como parti di e trayecto di preparacion pa e scolnan basico. Cada reunion a cuminsa cu un momento general unda a comparti informacion general pa esnan presente, sigui pa tayernan informativo pa e maestronan di klas 1 y pa finalisa e dia a sigui traha riba e topico di e Comunidad Profesional di Siñamento (CPS).
E cabesantenan a participa na tayer dirigi specificamente na nan riba e topiconan di nan escogencia, na unda a comparti informacion y sosten pa asina apoya nan den nan rol di sostene y motiva e maestronan di nan scol.
E cabesante- y maestronan di klas 1 a bin hunto dia 19 di januari, 16 di februari, 27 di maart y 19 di april 2024, pa hunto prepara debidamente pa e introduccion di siña lesa y skirbi na Papiamento den klas 1 na augustus 2024. Cada dia di estudio a tuma luga bou guia di Departamento di Enseñansa Aruba (DEA) conhuntamente cu Centro di Desaroyo Profesional Continuo (CDPC) di Instituto Pedagogico Arubano (IPA).
Dia 31 di mei venidero lo tuma luga e ultimo dia di estudio na unda cada CPS lo presenta y comparti nan producto final na nan coleganan presente. Di e manera aki e comunidadnan profesional ta sostene otro den e preparacion di e implementacion di e maneho nobo di idioma na unda ta siña lesa y skirbi na Papiamento.
DEA ta hopi agradecido pa e sosten ricibi di tur e cabesante- y maestronan.
Pa mas informacion relaciona cu Enseñansa na Aruba por acudi na nos website www.ea.aw.
Tambe por sigui nos den social media via nos facebook y instagram pages @educationaruba pa keda na altura di tur informacion.
