Ora un mayor ta cana den obediencia na Dios, henter su cas lo ta bendiciona.
Ora un yiu ta cana den obediencia na Dios su mayornan lo ta bendiciona.
Obediencia ta ley di cielo.
Desobediencia ta trampa di diabel.
Ora bo ta obediente bo ta cana cu Dios.
Ora bo ta obediente lo bo wordo bendiciona.
Noe tabata obediente na Dios. El a traha e arca, unda e mes y henter su famia a scapa di e diluvio. Aki nos por mira bon cla kico ta nifica obediencia di un tata na Dios, como un homber cabes di su cas.
Abraham a obedece Dios. Y ta yama tata di e nacionnan.
Josue a obedece Dios; Mira pa e buki di ley aki, lo no aparta for di bo boca, ma bo mester medita den dje di dia y anochi, percura di obedece henter e ley cu Mi sirbido Moises a ordena bo, no bira for di dje ni na man drechi, ni na man robes, pa bo por tin exito unda cu bo bay (Josue 1:8).
Exito sin obediencia na Dios, no ta berdadero. Pa nos conoce e berdadero exito den nos bida, nos mester tin Cristo Hesus na prome luga den nos bida. Pasobra awendia tin hopi tipo di exito falso; Por ehempel exito a costo di otro hende su bienestar. Exito temporal cu ta mustra bon, pero segun e tempo ta pasa e exito ta devalua, pasobra e no a wordo alcansa pa medio di obediencia na Dios.
Ora un tata ta obediente na Dios, e yiu su bendicion ta garantisa (Genesis 26:2-5).
Ora un tata ta desobediente na Dios henter e famia ta den dolor (1 Samuel 15).
Obediencia ta contagioso, e ta cuminsa den un cas di famia, pasa den un bario, yega na un pueblo y alcansa henter un pais.
Ora e lidernan di un pais ta obediente na Dios y su palabra, Dios mes ta zorg pa paz y bienestar, finansas y economia, y Dios mes ta mantene e enemigo leu for di nan (1 Reynan 5:3-5).
Den Isaias 1:19 ta skirbi: Si boso ta dispuesto y ta obedece, boso lo come e miho di e tera.
Hende obediente ta confia Dios, caminda no tin obediencia no tin fe. Ta imposibel kere den Dios y no ta obedecido na Dios.
Laga nos tene bon cuenta con leu desobediencia a hiba Jonas, y nota e bendicion pa su bida ora cu e a bini bek na obediencia (Jonas Capitulo 1).
E yiu perdi tambe a sinti consecuencia di desobediencia y el a bolbe bek cas di su tata, y wak e bendicion cu tabata sper’e (Lucas 15:11-32).
Hesus a contesta si un hende ta stima Mi, e lo warda Mi palabra, y Mi tata lo stim’e, y Nos lo bin cerca dje y biba cerca dje.
Esun cu no ta stima Mi no ta warda Mi palabranan, y e palabra cu boso a tende no ta di Mi, ma di e Tata cu a manda Mi (Juan 14:23-24).
Nos mester recorda tur hende kico Juan 3:16-18 ta bisa. Y no lubida locual Juan 3:36 ta bisa: Esun cu kere den e Yiu tin bida eterno, ma esun cu no obedece e Yiu lo no mira bida, ma e furia di Dios ta keda riba dje.
Nos tur ta yama pa biba den boluntad di Dios y cumpli cu e ley di Cristo (Galationan 6:2), cual ta siña nos pa restaura otro den tur momento.
Obediencia ta rikesa pa nos bida, ban cana den obediencia.
Sinceramente,
Pastoor Marcel Balootje.
