Despues di e momento historico diaranson anochi den parlamento pa votamento riba e proyecto di ley pa matrimonio di mesun sexo, awo tur cos ta den man di e presidente, mr. Edgard Vrolijk.
Ta papia di momento historico, pasobra a pesar cu tur 21 miembro di e organo aki tabata na parlamento, solamente 20 a drenta sala y e votacion na final a tabla manera un wega di futbol. Y nunca antes den e 38 añanan di Parlamento di Aruba, un proyecto di ley a haya un empate den votacion.
E votacion a duna como resultado 10 voto na fabor y 10 contra (cu 20 miembro presente den sala). Un resultado amargo pa esunnan cu tabata iniciado di e proyecto di ley aki: Misha Raymond (RAIZ), Miguel Mansur (ACCION21), drs. Marisol Tromp (MAS) y Aguannette Gunn (MAS).
Un votacion cu di parti di fraccion di MEP tabatin solamente un voto na fabor, mientras cu oposicion tabata esun cu a carga e votacion cu casi a yega na su aprobacion, si no tabata pa e cambio di opinion di diferente miembro e momento ey. Por lo menos e cuater parlamentarionan cristian di e fraccion di MEP tabata esunnan mas sincero cu for di prome instante indica cu lo no vota na fabor.
Presidente di Parlamento mr. Edgard Vrolijk a pasa den momentonan sumamente fastioso durante e reunionnan aki, a pon’e bou di hopi presion y dado momento por a tuma nota di esaki tambe, for di su actuacion (perdiendo pasenshi). Y incluso, mester a schors e reunion un rato pa baha e emocionnan.
E nerviosismo di Vrolijk probablemente tabata pa e final di e reunion yena di tension, cu e tabata sa cual tabata e resultado pa e strategia uza y cu na final tur cos ta keda den su man. “E reunion a bay vlot, pero por a caba mas lihe, causa pa cosnan di bay bin. E resultado a sali 10-10 y nos tin cu bin bek pa vota un biaha mas. No tin un fecha ainda, nos tin trinta pa dia hacie. Nos tin tempo. No tabatin strategia, y a vota segun nos consenshi.” Vrolijk su postura tabata mescos di mayoria di esnan cu tabata na fabor, pero a vota contra na final, of no a vota manera Shailiny Tromp-Lee, cu a huy of trata di huy pa no duna un declaracion.
Kico awo
Segun palabra di e propio presidente, e tin 30 dia pa yama reunion. Pero e reunion ey por a wordo yama di biaha, si tabata desea esaki. Sinembargo hustamente a causa di e tension y e tema controversial, a opta pa “laga e emocionnan fria”. Y e trinta dianan cu por uza pa warda e emocionnan baha, di malcontento, ta cay hustamente den e periodo cu Corte di Casacion lo duna su decision riba e tema di
Matrimonio di mesun sexo
Abogado general ya caba a duna un conseho na Corte di Casacion: Respeta e decision di Hof pasobra e ta corecto. Awo falta nada mas 22 dia pa scucha si ta bay di acuerdo. Si esey sosode, no mester yama e reunion mas, pasobra manera Prome Minister mr. Evelyn Wever-Croes a bisa: Decision di casacion ta bay riba esun di parlamento!.
