E tabata un strategia bon hinca den otro unda cu hasta e “por si acaso” tabata planea. Un wega unda e final tabata palabra pa no mustra directamente cu “a laga partner na caya” y tampoco e posibel votadonan (tanto Cristian como e comunidad LGBT+).
For di algun dia caba por a scucha cual lo ta e strategia cu no tin nada ta bay sali di e reunion di matrimonio di mesun sexo.
Gobierno a bay casacion cu e decision di Hof pa motibo cu un corte no por sinta riba stoel di legislador of di gobernante. Awo algun luna despues diripiente for di mas cu un siman pasa e prome mandatario di Aruba a bin ta promove e pensamento cu mester warda riba decision di Corte di Casacion y cu e decision di e organo aki ta bay riba esun di Parlamento.
Loke tabata remarcabel den e reunion aki ta cu coalicion y oposicion completo tabata na parlamento, no den e sala. Tabatin un spirito cu tabata bula rond y tabata e piesa di reserva si algo mester bay fout: Shailiny Tromp-Lee. Un miembro di Parlamento cu inicialmente no tabatin obhecion riba e ley ey, pero na final e strategia mester a prevalece. Lee tabata bula rond den Parlamento, presente pero no presente.
E no a participa activamente den e reunion. Esaki ta bisa tur cos di e strategia: Pakico bo ta den Parlamento y a opta pa no drenta e sala y participa? Y na final a huy di 24ora.com pa no duna un declaracion (splicacion na pueblo). A pesar cu tabata trata di un ley controversial pa e pensamento dividi den pueblo, den Parlamento lo a pasa toch. Wel, esey tabata e pensamento te despues di e reunion di MEP diamars ultimo. Den e reunion ey a busca e formula pa no haci e golpi mucho doloroso.
Sinembargo e tabata doloroso si mira cu na final por a mira awa ta basha for di wowo di e Parlamentario Misha Raymond, kende no por a contene su emocionnan. Toch el a kere cu nan partner den coalicion “lo para pa derecho igual.”
For di momento cu a yama un senioren convent prome cu e reunion publico, por a hole cu tin algo na caminda. Kier a haya siguransa con ta bay conta e votonan na final. Esey tabata pa sigura si e spirito Shailiny mester participa of no den e reunion, y e votamento. Si e mester vota pro of contra of si e mester abstene.
Banda di esaki, pafo den pueblo, e voto di cada parlamentario ta trece hopi cuestionamento, pero principalmente esun di lider di fraccion di AVP Mike Eman. Un persona cu a lucha pa derecho humano, cu a celebra e lucha victorioso di diferente lider manera esun di Nelson Mandela, Martin Luther King y Anne Frank.
Pero pa e politico den e caso aki, mescos cu algun parlamentario mas, e pensamento religioso tabatin mas peso cu e articulo den Constitucion cu tur ciudadano tin derecho igual den situacionnan igual.
Na final, e reunion di diaranson, 8 di mei, 2024, lo ta uno historico den mundo politico di Aruba. Pa su resultado y e strategia perfecto ehecuta. Y cu a demostra cu den politica semper tin e man di un titire den movecion.
