Finalmente parlamentario Shailiny Tromp-Lee (MEP) a sali afo, mas cu 12 ora despues di e votacion den parlamento, pa splica e motibo di su postura tuma den parlamento. Esaki tabata durante e reunion riba e proyecto di ley di matrimonio di mesun sexo. Su splicacion ta e dilema entre su Fe y su pensamento principal cu amor ta amor.
E ta admiti cu su rol den loke a pasa diaranson ta e noticia di momento. “Den mi 7 aña den parlamento ta mi prome biaha cu mi ta abstene y mi kier pa boso sa cu mi abstencion tabata mi decision.” E ta sinti tambe cu e mester splica pakico el a abstene di vota den un ley di e indole aki. “Mi kier tuma e espacio pa mi ta sincero cu boso y pa mi comparti mi sentimentonan “curu”.
E ley aki desde un principio tabata hopi dificil pa mi. Un debate interno basta pisa a tuma y ta tumando luga ainda. Mi ta memey, pasobra mi ta compronde y mi ta sinti pa tur dos banda.” E ta splica di ta bini di un famia hopi religioso, cual a forma e fundeshi di su Fe, cu a dun’e paz y stabilidad. Pero e ta mustra riba algo cu a pasa recientemente den su famia, cu a pone un peso mas grandi den su pensamento. “Diariamente mi a y ta bati na porta di Papa Dios pa gradici y pidi. Den mi bida mi a pidie pa E haci milager y obra den salud di mi yiu y mi casa. Mi a bib’e di cerca. Dios a haci e milager den mi bida, el a sana mi yiu y mi casa.”
Sinembargo e dilema ta bini di su otro pensamento. “Di otro banda mi ta sinti pa e dicho amor ta amor. Mi no ta sinti cu ta keda na mi pa dicidi ken si of ken no. No ta na ami pa stroba felicidad di otro. Ken ami ta pa husga amor? Ami ta convenci cu mi Dios ta un Dios di amor.”
Den su post, poni riba Facebook, e ta admiti cu su dilema ta grandi y su debate interno tambe fuerte.
Y esaki ta algo cu a compañe diaranson tambe. Den mi trayectorio di bida ami semper tin mi opinion, por argument’e y present’e. Echo ta cu pa e topico aki esey ainda no ta e caso.” Di e forma ey el a indica cu tur cos ta draai rond di e duda di ki posicion e mester a tuma riba e tema di matrimonio di mesun sexo. Y como cu e no por a sali di e duda, a dicidi di keda sin vota.
