Hapon y Senegal a empata den e di dos buelta di Grupo H (2-2), kedando ambos cu 4 punto frente e clasificacion y lo bay hunga den e pase pa e octavonan di final den e ultimo buelta.
Senegal a realisa un modificacion lihero respecto e prome partido, introduciendo un hungado extra den medio campo, kisas pa controla e bon wega asociativo cu e conhunto Hapones tin. For di comienso, e sensacion tabata bon, cu e ekipo bon arma den campo propio, concediendo poco espacio y saliendo na contragolpi, danki na e velocidad di Mane, Niang y Ismaila Sarr.
Den minuut 11, Senegal a logra bay dilanti, despues di un accion desafortuna di Kawashima, e portero Hapones, cu a rechasa un mal disparo y e bala a pega den rudia di Sadio Mane, kende a estrena den e cita mundialista. E Asiaticonan, esey si, a responde francamente bon y mey mey di e prome parti, un gran definicio di Inui a nifica e empate.
Den e di dos mita Hapon a mustra hopi mas dominante y di hecho, Inui a bolbe tin un bon ocasion den minuut 62 tras di ricibi un magnifico pase di Osako, pero su disparo a pega den e cruceta. Senegal no a logra desplega cu regularidad, pero un bon accion ofensivo ehecuta pa su dos lateralnan a dun’e un bentaha parcial. Sabaly a hinca un bon bala na Wague y esaki no a pordona.
Hapon a sigui mustra gran impetu y amor propio y a probecha di un eror den e salida di Ndiaye, e keeper Senegales, pa pone e 2-2 cu lo ta esun definitivo. Honda, cu tabata suplente, a probecha un bala los pa marca den un izquierda y confirma cu nos ta papiando di un di e gruponan mas emocionante di e torneo.
