Diabierna y diasabra ultimo e federacion di baseball di Aruba ABBA a hasi entrega di materialnan di baseball ricibi for di “Orioles Advocates y nan Cardboard to Leather program” pa medio di Sr. Melvin Mora.
ABBA huntu cu representante di diferente organizacionan di baseball a sa di persevera y inventarisa un container di 40” cu casi 300 caha di material di baseball tanto nobo y usa. Pa varios siman a hasi inventarisacion y asina cu transparencia a reparti materialnan pa tur e organizacionan di Aruba den parti igual. Diabierna pa medio di un programa di distribucion tur organisacion a busca material na Entertainment Center.
Esaki a bai den bon coordinacion y dushi ambiente. Nos por a mira e caranan di aprecio for di tur dirigente pa e gesto cu ABBA bou di auspicio di presidencia di Sr. Sherwin Howell a bin ta traha p’e for di varios luna. Diasabra mainta trempan ja prome cu 9or di mainta, e comunidad di Aruba a para den rij pa asina warda e porta habri pa busca e materialnan cu e mucha ta desea. A parti helm, cather’s equipment, gloves, batting gloves, cleats, tas, uniform etc.
Nos por bisa cu e bazaar di diasabra a bai super bon y den mas of menos mei ora tur cos a caba. Nos ta spera di por keda ofrece comunidad di Aruba y baseball tipo di projectonan asina cu ta yuda e teamnan cu material cu tin un costo hopi halto.
Gradicimento ta bai pa tur esnan cu a hasi e projecto aki posible, nan ta Sr. Alfonso Boekhoudt, Sr. Gregory Peterson, Comicion di Evento di ABBA, Fundacion Lotto pa Deporte, Stichting Sport Subsidie Aruba, Arumil, DOW, Astec, Douane, Perez & Cia y Sra. Josephine Lacle, Sr. Melvin Mora y Sr. Mike Licea di Orioles Baltimore.
ABBA ta manda palabranan di pabien pa tur organisacion y basebolistanan. Enjoy!
