“Nos digno pueblo a wak cu lider di AVP Sr. Mike Eman a purba lanta pueblo 3 biaha contra Gabinete Wever Croes. Algo sigur hopi controversial di e ex Prome Minister di Aruba,” segun candidato riba lista di MEP, Rudy Richardson.
E ta continua: Despues di a retira di parlamento na 2017 cu un perdida di mas di 10.000 voto, Sr. Eman no a tuma e señal aki na serio. A sigui instrui su 9 parlamentarionan bao guia di Sr. Marlon Sneek cu ta e mesun parlamentario cu a aproba tur presupuesto di pais Aruba desde 2009-2017. Awo cu nan ta den bankinan di oposicion nan ta sigui troce e berdad y hunga cu sentimento di nos pueblo. Nan vakminister Sr. Angel Bermudez (0) voto no a traha presupuesto di 2017 prome cu su salida, esaki Gobierno di Sra. mr. Evelyn Wever Croes mester a haci, despues traha un presupuesto pa 2018, anto awo ta trahando pa e prome presupuesto 2019 di Gabinete Evelyn Wever Croes ser entrega na September proximo.
Problemanan hereda
Gobierno a logra stabilisa e retonan riba finansa publico hereda y tambe recobra simultaneamente Aruba su credibilidad den mundo financiero internacional. E famoso Proyectonan pa Pueblo Paga (PPP) a bira realidad y awo ta ora pa paga pa nan. Mike Eman a hiba campaña politico cu nan, manera su celebracion di cumpleaños riba brug cu a costa pueblo un dineral. Aunke gobierno a corta den varios area di nos presupuesto nacional no tawata tin recurso suficiente pa cubri e 80.7 Miyon pa aña cuminsando na 2019 y pa e proximo 25 añanan. A haya su mes obliga di trece un crisisheffing di 2.5% extra. Pues 1.5% pa paga e brug nobo di Mike, hospital cu hala di problema y meerwerk, Ringweg 3 y e MFA’s combina cu esun spirito na San Nicolas. E extra 1% ta pa buta orden den AZV, e seguro medico general cu actualmente ta pasando den hopi reto mirando cu no tin control debido riba costo den e organisacion medico. Awo ta trahando riba varios otro aspecto di gobernacion cu enfasis riba e tereno social y husticia cu mester mas atencion actualmente, pa no bisa cu ta cada Ministerio tin su retonan specifico, e.o. Asuntonan general, Transporte, Economia y tambe Salud Publico. Nos por a wak mas tienda den Caya Libertador Betico Croes a cera nan porta, anto cu ainda tin e caso di e contratista Mambraca den corte. Nos por a wak Banco Central di Aruba a baha su tasa di crecemento economico pa 2018. Tur esaki e gobierno actual a sa di domina cu trankilidad irespecto tur e fake news cu medionan comprometi ta trece tur dia. A yama un reunion fracasa den Parlamento, a yama reunion na cas di partido na Playa y siman pasa a yama un reunion na YMCA San Nicolas y tur biaha nan tawata un fracaso. Colmo de los colmos cu hala di mentira, speechnan sin pia y sin cabes, ta parce cu e partido a caba di wordo funda. No tin structura den e manera cu e politica ta wordo hiba. Sr. Eman a hasta busca un academico recientemente pa yuda “renoba” e partido berde.
CAft a caba di aproba e presupuesto 2018
Pome Minister Evelyn Wever Croes hunto cu Minister di Finansa, Economia y Cultura Sra. Xiomara Ruiz Maduro a duna e bon noticia, cu CAFT a caba di informa conseho di Minister cu Presupuesto 2018 ta cla y aproba. Nos a duna nan e informacion cu a convence nan cu e Gobierno aki ta riba bon caminda pa pone orden den finansa publico. E reto mas grandi di nos Gobierno ta pa mantene e balans entre sanea nos finansa, pero mes momento atende cu e retonan social y economico di nos pais, crea empleo y trece progreso y bienestar pa tur ciudadano di nos pais. Awo nos lo intensifica e vision di e Gabinete actual y implementa varios punto di gobernacion e siguiente lunanan nos dilanti. Tambe tabatin un Small Business Event organisa pa Minister di Finansa, Economia y Cultura cu un exito total. San Nicolas logicamente no ta kedando atras y tambe lo haya su fairshare. Minister President Evelyn Wever Croes ta introduci AREA Aruba Re-imagined Areas pa reactiva actividad economico na San Nicolas, tambe tin SNBA San Nicolas Business Association cu San Nicolas The City Of Innovation & Culture cu lo wordo presenta den un townhall meeting diamars awo 26 di Juni, 2018 na Santa Teresita Center 7 pm na pueblo. Tin varios otro iniciativa tumando lugar riba tereno social, cultural tambe cu lo bira realidad muy pronto. Porfin San Nicolas despues di un negligencia structural y premedita a cuminsa haya atencion di Gobierno y varios stakeholders. Tin hopi proyecto andando den e area di Promenade cu lo cristalisa pronto dunando e prome parti di San Nicolas bida bek. Mi ta consciente cu tin hopi mas pa haci y p’esey mi ta pidi e digno pueblo pa carga pasenshi y ban sigui duna gobierno e sosten necesario pa por implementa nos programa di gobernacion. “A quien madruga Dios le ayuda.”
