Magic FM como bo emisora cu ta cubri tur evento historico, ta cla prepara pa trece pa bo e evento deportivo mas grandi di cada cuater aña, esta Copa Mundial cu pa aña 2022 lo tuma luga na e Qatar, cuminsando 20 di november pa 18 di december 2022. Ta bay tin un total di 64 wega cu lo keda hunga durante e temporada di mundial, di cual e emisora t’ey cubri e gran mayoria pa nos isla. E deporte di futbol ta trece e nacionnan di mundo hunto.
Un total di 32 team lo bataya pa asina mira cua team ta bay cas cu e codicia copa mundial. E teamnan manera: Alemania, Argentina, Hulanda, Brasil ,Belgica, Croacia, Dinamarca, Spaña, Francia, Inglatera, Polonia, Portugal, Uruguay, Serbia, Suisa, USA, Ecuador, Senegal, Australia, Mexico, Qatar, Hapon, Serbia, Maroco, Wales, Tunisia, Cameroon, Korea, Saudi Arabia, Costa Rica, Inglatera y Ghana tambe ta cla.
Introduciendo e caranan nobo hunto cu Cadochi Kock
Magic FM a prepara un team di comentarista capacita y cu amplio experencia den e tereno di futbol cu lo duna tur e detayenan di e hungadonan y tambe e estadisticonan di e weganan, combina cu e historia di Copa Mundial kende ta e.o. Cadochi Kock. E biaha aki introduciendo e caranan no desconoci den e mundo di futbol, esta Arianne Westerburger y Devin de Veer. Ambos ta conoci como lider femenino actual den e mundo di futbol infantil y hubenil.
Ken ta e presentadonan e aña aki
Cadochi Kock
Conocido presentado cu ta cumpli 40 aña den transmision e aña aki y naracion dje weganan di futbol. Despues di a presenta deporte pa hopi aña na television, a transmiti na radio y tin un carera impresionante den deporte, e aña aki un biaha mas ta bay comparti su experiencia y conocemento di e mundo di futbol den e weganan mundial di QATAR 2022. El a cuminsa su carera como narador aña 1982 ora cu AJAX a bin hunga na ARUBA contra RCA dia 7 di januari ’82 y e no por a hunga, ya cu el a kibra pia den e ultimo wega di campeonato cu tabata dia 15 di december 1981.
Tabata Janchi Tromp e.f.m. cu a invita Cadochi pa comenta e wega RCA/AJAX hunto cu ne. Janchi tabata nara y Cadochi a comenta. El a cay na agrado di hopi oyente. El a sigui comenta cu Janchi, trahando den casino y e coleganan di trabou tabata bisa Cadochi pa sigui nara. Cadochi a transmiti varios wega pa Z86 tanto aki na Aruba como Corsou. Alabes a transmiti pa TELE CURACAO durante un torneo internacional cu Inter milan- Santos-sel di Venezuela y UNDEBA reenforsa hunto cu Don Hector Rosario y Sol confedor.
Alabes a transmiti varios wega hunto cu Gonzalo Cuales na TV 11 y a transmiti eliminatorio pa Mundial 98 for di Baranquilla, Colombia, durante e wega entre Argentina y Colombia. Cadochi a transmiti for di Trinidad y Surnam na diferente ocasion. Varios aña tambe na e canal ATV, a cuminsa cu e weganan di Mundial, Copa America, Copa Confederacion -Copa Europa y e weganan eliminatorio. E aña aki lo ta di tres Copa Mundial cu e ta bay nara pa MAGIC 96.5 FM. Cadochi keto bay ta mantene su mes den condicion door di ta constantemente den movecion cu futbol, ta hunga golf y ademas ta keda activo cu cana tur dia. Famoso pa canta su golnan y nara wega den su estilo unico.
Devin de Veer
Tin 28 aña di edad y a nace aki na Aruba. El a cuminsa di chikito den landamento sincronisa, desde su 9 aña di edad y cu 13 aña tabata forma parti di e team nacional di Aruba y a representa nos isla na Republica Dominicana, Corsou y Puerto Rico e.o. Devin a biba dos aña na Corsou y aya a coach Club di Synchro na Corsou.
Devin a hunga volleyball pa seis aña largo. Apart di tin un trabou importante den e compania MetaCorp, su amor pa deporte ta bisto. Despues di a bin bek Aruba ta envolvi cu RCA y ta lider di muchanan bou di 5 aña. E tin su licencia D como coach di futbol y a maneho di e team como miembro di directiva di e team di RCA y ta kedando cla cu Licencia C.
Arianne Westerburger
Ta mama di dos cu un amor y pasion pa e deporte futbol. Naci y biba na Aruba den e bario di Companashi. Arianne a lanta ta haci ballet y baila den grupo di baile y canta den coro (De Trupialen). El a cuminsa haci e deporte rey cu e edad di 12 aña pa su team RCA y a sigui haci e deporte aki te na un edad mas adulto. El a hunga seleccion di Aruba contra entre otro Corsou, Boneiro, Colombia y USA (college team). Aparte di su trabao, Arianne a subi escenario pa prome biaha cu su 15 aña na Corsou cu e orkesta OREO. El a forma parti tambe di Zeta Band, Orkesta Delicious y awo despues di algun aña den background, ta forma parti di e banda SUONA. E amor pa futbol ta algo cu el a lanta cu ne biniendo for di un famia di futbol diariamente. A yega di hunga pa Riverplate y SV Dakota y ta gradicido na e team y coach. Na aña 2018 a aserc’e pa bay bek RCA na unda a hunga pa mas of menos dos aña. Awor Arianne ta forma parti di e directiva di RCA for di december 2021 como secretaria y tambe como leidster di division U20 y tambe ta kedando cla cu Licencia C.
Na caminda pa mundial
‘Na caminda pa mundial’ a cuminsa desde luna di augustus 21 y despues lo desemboca den transmision y cobertura di e weganan mas grandi y importante cu lo cuminsa oficialmente dia 20 di november pa 8 di december 2022. E weganan lo ta 6:00 am–9:00 am, 12:00 pm y 3:00 pm y e emisora lo cubri practicamente esunnan mas popular durante henter e temporada, cual ta un total di 42.
MAGIC FM ta gradici e partnernan den comercio cu a duna nan sosten pa realisacion di e bunita proyecto deportivo unico aki, cu lo hala atencion di mundo completo. Sin nan apoyo ta sumamente dificil pa logra algo asina grandi y bunita. Durante e transmisionnan ta bay tin chens di gana varios premio y hasta cash!
