E aña aki a tuma luga na Corsou e Torneo Internacional 2019 di Bolas Criollas, unda cu Aruba a participa den dje cu 4 team di dama y 4 team di cabayero. Durante e competencia na Corsou tur team di Aruba a logra clasifica den nan poule pa e siguiente rond di e campeonato.
E teamnan a sigui competi pero 6 di e 8 a cay afo den e di dos ronda, mientras cu e dos teamnan Shotaz y Tira Malo Pega Bon den tanto dama como cabayero a sigui den e competencia. Despues di 1:00am e team masculino y e team femenino di Tira Malo Pega Bon di Aruba a titulo campeon di e campeonato 2019.
E teamnan di Aruba a cuminsa competi diahuebs anochi, unda cu Shotaz a perde nan prome wega. E di dos dia nan a yega veld y cu e meta di gana nan siguiente weganan pa asina clasifica. Nan a sali como di dos for di nan poule y a keda bataya pa por a yega final.
E teamnan masculino cu a topa otro den final tabata Angels Boys di Corsou y Shotaz di Aruba, unda cu despues di 1 ora di wega Shotaz ta logra bay cu e titulo. Den e categoria femenino Tira Malo Pega Bon di Aruba a gana Rasta Girls di Boneiro pa asina bira e campeon di Bolas Criollas. Tambe Aruba a logra bin cu e trofeo di miho arime den cabayero cu a bay pa Edmond Tromp di Shotaz y miho boche den femenino cu a bay pa Giandra Boekhoudt di Tira Malo Pega Bon.
Cu un caluroso bon bini y cu yen di alegria e famia a ricibi e hungadonan di Shotaz, kendenan tabata contento di nan triunfo y di ta bek na Aruba. Pa Shotaz e aña aki tabata e miho pa nan, unda cu nan a bira campeon di e competencia di Bolas Criollas dia 18 di maart y awo campeon internacional 2019. Nan ta gradecido na tur cu a yuda nan pa por a bay Corsou y representa Aruba, pero tambe di e oranan largo cu cada uno a hinca durante e trainingnan.
