Asina cu a cuminsa papia cu ta bay privatisa e planta di purificacion di awa di riool (RWZI), a surgi e preocupacion kende ta bay paga pa esaki. Awo cu a dicidi cu ta e bishitante lo carga e gasto aki, ta surgi otro preocupacion: Aruba no ta birando demasiado caro?
Ultimamente a tuma nota di diferente comentario riba rednan social unda cu ta menciona cu Aruba a bira demasiado caro. Localmente, e percepcion ta cu esaki ta debi na e cantidad di medidanan fiscal tuma ultimo aña.
E miedo ta cu lo por bin mas heffing na Aruba y tur na final lo tin consecuencia riba e bida diario riba e isla, no solamente pa e local pero tambe pa e bishitante.
Por lo menos Conseho di Minister, segun premier mr. Evelyn Wever Croes, no tin conocemento di ningun heffing mas cu ta na caminda. Pero “mester bin un solucion pa RWZI y nos tur ta di acuerdo cu mester bin un solucion”, tabata e prome reaccion di e mandatario ora cu a consulta cu ne riba e preocupacion ariba menciona.
E mandatario a enfatisa cu e situacion actual no ta duna pa sigui den e forma ey. Si nos tur ta di acuerdo cu mester bin un soluciona, e siguiente pregunta ta di unda e solucion ta bin. For di shelo e no ta bay cay. Un planta no ta bay cay for di shelo, para eynan y cuminsa opera. Mester construi esey.”
Mester bin un planta y mester busca un manera pa financia esaki. Gobierno a dicidi cu e placa no por bini di pueblo di Aruba. Y mester bini di turismo y esey ta un decision cu a tuma despues di consulta cu comunidad, cu a indica esey ta e caminda pa cana.
E ta admiti cu personalmente e ta preocupa cu ta “overprice” Aruba. E ta un argumento cu ta scucha continuamente. Pero, e ta bisa, si mira con e prijsnan di hotel ta aumenta considerablemente durante temporada halto, anto mester tin un poco espacio pa e impuesto aki “cu no ta djis pa yena saco di multinacionalnan cu ta bay cu tur e ganashi. Esaki ta bay pa e turista, kendenan ta keha riba e tema aki. Ta pa turismo mes nos ta busca un solucion y p’esey a busca e solucion den e area turistico.”
