E siman aki Prome Minister mr. Evelyn Wever Croes a anuncia cu e proyecto di ley pa privatisacion di RWZI ta drentando un fase crucial. Ta e siman durante cual e miembronan di parlamento lo mester manda nan pregunta riba e tema aki pa despues gobierno duna contesta.
Hustamente durante e conferencia di prensa dialuna ultimo, e mandatario a bisa cu ya caba tin un tipo di tarifa stipula “pero mi no ta corda tur aworaki”. Loke si el a splica tabata cu e suma ta depende di e grandura di e camber. E impresion tabata cu sea e mandatario no tabata mucho envolvi of no kier a bay den detaye riba esaki, debi na e diferencia di opinion cu tin pa e forma cu a scoge pa busca e finansa pa cubri operacion di RWZI den futuro.
A consulta cu director ehecutivo di AHATA, Tisa LaSorte riba e tema aki y a bisa cu en realidad e no ta di acuerdo cu e forma di e impuesto cu finalmente a dicidi riba dje. Nan ta mira cu esaki tin hopi buraco.
E ta bisa cu nan di sector hotelero ta compronde e urgencia pa soluciona e problema aki, principalmente na Bubali Plas, pasobra tin un riesgo hopi grandi, ya cu e ta den zona hotelero.
“Nos ta di acuerdo cu e ta un solucion urgente. Pero e mester un solucion corecto tambe y no solamente lihe.”
Pa cuminsa, LaSorte ta bisa, esaki no ta un solucion lihe pa motibo cu ta trata di un problema di algun decada caba cu gobiernonan a neglisha e problema di RWZI pa cual awo ta den urgencia cu mester core bin cu un solucion.
En bes di haci un cobransa na residentenan y tur compania estableci riba e isla, incluyendo e hotelnan cu ta uza e awa, a dicidi pa algo otro. A dicidi pa un impuesto riba turistanan. “Si esey ta nan decision, nos a bay wak kico ta e opcionnan, pa e diferente impuestonan. Nos no ta di acuerdo cu e impuesto cu a scoge pa haci, esta e environmental levy.” El a splica cu nan no ta di acuerdo pasobra e ta un impuesto extra cu ta pone riba e prijs di camber. Manera e ta awo, timeshare ta page pa siman y hotelnan y vacation rentals ta pag’e pa anochi.
E forma con esaki ta hinca den otro, no ta algo cu por kita, pasobra e no ta den porcentahe. Si un dia un hotel kier dicidi di baha e tarifa di camber di hotel, pasobra cos ta slow, e impuesto no ta baha. E no ta duna flexibilidad manera cu si lo sosode ora cu uza porcentahe. E compania ta baha nan prijs pero e suma di e levy ta keda mescos.
Pero nan preocupacion di mas grandi ta cu no ta tur hende den e industria di turismo lo paga esaki. Mayoria di e casnan cu ta haci vacation rentals no ta paga e impuesto aki. Un biaha mas ta introduci un impuesto cu ta pone tur e peso riba un grupo chikito di compania cu si ta cumpli cu ley y ta duna mas incentivo na esnan cu no ta cumpli cu ley. “Bo ta encurashando e economia informal, algo cu gobierno no mester haci.” Pa e motibo menciona ta miho introduci un impuesto cu tur turista ta paga y na final e suma lo por ta menos.
Segun por a compronde, tin un diferencia den loke e levy di camber di hotel / vacation rentals ta compara cu esun di timeshare. Pa hotel awo ta cobra 5,37 florin pa anochi (pa camber di hotel ocupa). Y Timeshare ta paga 12 dollar.
Den e cambio haci, e hotelnan di timeshare tin un diferencia dependiendo di e grandura di camber. Esun cu ta haci uzo di un studio, ta paga awo 17,90 florin (pa siman); 26,85 florin pa uzo di camber di un persona, y 44,75 florin pa uzo di tur otro camber.
Di otro banda, segun e proposicion, e huesped di hotel ta bay paga awo 21,50 florin pa anochi. Den caso di timeshare ta bay cobra 69,80 florin pa un studio, 103,80 florin pa uzo di camber di un persona y 173,65 florin pa tur otro camber.
E diferencia aki lo tin hopi hende rabia, incluso den Conseho di Minister.
