Un P’ami un Pe ta celebra su di 12 aña di existencia hunto cu e muchanan di Stichting Imeldahof. Un P’ami Un P’e, manera e nomber di e proyecto ta indica, ta unda cu Rotaract Club of Aruba ta trece concientisacion den nos comunidad pa yuda un otro.
Rotaract ta pidi e communidad di Aruba cu ora nan ta cumprando algo pa nan mes “un p’ami”, pa nan pensa riba un otro persona den necesidad y asina den e caso aki cumpra algo pa e muchanan di Imeldahof, “un p’e. E aña aki Un P’ami Un P’e a colabora cu cinco studiante di Universidad di Aruba sector turismo pa nan curso “MICE” na scol.
Durante dos luna e miembro nan di Rotaract Club of Aruba hunto cu cinco studiante di Universidad di Aruba tabata uni dilante Dyon Center riba diasabra. Durante e mainta nan aki e miembronan tabata tin un lista di materialnan di obranan di man pa por collecta cu e yudansa di communidad pa despues por hasi donacion pe muchanan di Imeldahof.
Rotaract Club of Aruba y Universidad di Aruba a logra collecta hopi articulonan pa haci obradi man na e balor di cuater mil florin cu e yudansa di Aruba su communidad.
Ademas di e donacion Rotaract a hiba e muchanan di Imeldahof na De Palm Island. E muchanan a gosa hopi pero tambe e leidsters di Imeldahof a disfruta di un dushi dia hungando den awa, Banana boat rides, Snorkeling, Zipline, Air Jumpers y e slipnan cu e muchanan.
Rotaract Club of Aruba y Universidad di Aruba kier a gradici tur esnan cu a duna un man na e bunita proyecto aki, pero tambe esnan cu a contribui den un otro parti tambe cu ta Dyon Center, De Palm Island, Super Shopping, ECO Destinations, Guardian Group, Lucky Store y Fatamorgana. Alabes un danki special ta bai na e miembronan di Rotaract y studiante nan di Universidad cu a para tur e 4 diasabranan pa colecta e productonan y tambe pa bin pasa un dia yena cu diberticion cu tur e muchanan di Imeldahof na De Palm Island.
Por ultimo Rotaract Club of Aruba y e studiante nan di Universidad kier a gradici e comunidad di Aruba pa nan gran aporte na e proyecto aki. Sin e sosten di nos comunidad nos no lo por a logra e bunita proyecto aki.
