E preocupacion grandi cu tin bou pueblo di loke e turistanan ta comenta riba rednan social, tin atencion di politica local tambe. Ta papia aki di e pensamento y percepcion cu Aruba ta hopi caro. Y awo cu tur e medidanan hunto, e aumento di levy pa financia un RWZI nobo, ta haci e preocupacion aki mas grandi.
“Ni turista ni pueblo por carga mas,” ta e pensamento di e parlamentario di fraccion di AVP ing. Mike de Meza.
SI analisa e situacion, e no por conclui otro cu “Aruba ta “outpricing” su mes, birando sumamente caro.” Loke por mira ta cu gobernacion bou liderazgo di Evelyn Wever-Croes a suta pueblo cu medida y ta pone bo pensa con e pueblo lo por sali di e situacion aki. Nan no por cumpli cu nan debernan financiero.”
El a mustra riba e declaracion di e propio mandatario cu a bisa cu pueblo no por carga mas. “El a ripara cu el a suta pueblo cu medida tras medida, pero no a drecha nada na Aruba. Awo e siguiente meta ta e turistanan, esta esnan cu ta trece placa pa Aruba. Awo eynan e ta bay purba saca placa.” E politico ta cuestiona e forma con Croes ta maneha e situacion menciona. Esaki pasobra en bes di baha gasto di personal, ta simplemente sigui yena e aparato gubernamental, via di fundacionnan unda cu “friends & family” ta haya trabou. “Eynan e no kier corta e gastonan, pero ta busca ken su saco e por drenta y e siguiente victima ta e galiña cu ta pone e webo di oro.”
Hustamente dialuna tabatin un reunion di comision central di turismo unda cu A.T.A. tabata presente y nan a alerta cu e costonan di vakantie pa e turista na Aruba ta birando mucho halto. E gobierno no mester lubida cu tin hopi competencia den region, unda cu e gobiernonan ta invertiendo den e pilar economico aki. Husto den e momentonan aki di competencia fuerte, Aruba ta trahando pa “outprice” su mes. “E lo tin efecto riba e entrada di turista cu Aruba mester di dje.
Ta tristo cu den un situacion manera ariba menciona, ta haya awa stinki y desperdicio tur rond. De Meza no ta compronde, pasobra e ta haya cu por baha e gastonan mas. “SI bo mester di un minister, bo sa unda bo mester bay. Djis para na aeropuerto y bo ta topa cu nan. Un ta drenta y otro ta sali. Esey ta nos mandatarionan.”
