Falta poco dia pa bay urna electoral pa deposita bo voto. Corda no haci e mesun eror cu pasado a siña nos. E gobierno den su prome gobernacion sea ta cu AVP of MEP ta purba haci lo miho, pero den e di dos tanda e patronchi ta cambia y bira un gobierno golos cu poder. Mi persona a yega di vota pa e parti emocional y custumber liga na kico ademas MEP a haci pa mi den tempo di Betico y Nel. Awe tur dos partidonan, esta MEP y AVP a para bira otro ehemplo egoista pa pais Aruba. Honestidad y integridad no t’ey mas den tempo di nos ex mandatarionan. Awor, politiconan ta purba mas tanto yuda bou mesa y crea formulanan di corupcion cu ta aparenta legal.
Si papia di AVP, tur hende sa cu den dia cla a “horta” pais Aruba via e amigonan. Tin minister y nan amigonan a bay cera y ainda falta mas. Den pasado algun tabatin e suerte di no ser persigui mas, pero ta keda cu e seyo y marca di ta corupto. Pero toch pueblo a vota pa nan y a dura hopi pa saca nan afo di gobernacion. Ken por bisa cu e mala maña a cambia di AVP? Mi sa cu tin hende, ni ki malo AVP haci, toch ta sigui vota pa nan ya cu e politico ta bisiña, amigo, etc. y ta gusta un custumber of tradicion cu ta partido grandi so sa goberna. Esaki ta un problema di mentalidad pingpong.
Si, papia di MEP, e ta un partido di e medidanan premedita cu ta trata di pinta e cosnan bon. Mi ta duna un ehempel. Ta kita hende di gobierno, ta baha gasto directo di gobierno, ta pone belasting, etc. pero, di otro banda, ta busca consultants, famianan, amigonan cercano cu ta fiel na nan pa duna e proyectonan y negoshi pa trabou. Kiermen, e gastonan halto di e maneho di gobierno ta keda halto. Uno ta horta sin “give a them”, y e otro ta hunga sabi (play wise) y tambe ta tuma un omweg bini bek cu e peso di medidanan ariba pueblo humilde di Aruba. Kiermen, tur dos ta mescos.
Compatriotanan, votadonan, e bolo cu nos mes ta prepara cu nos mes ingredientenan ta di nos mes como doño. Nos tin cu presta algun gobernantenan pa un prijs cu nos mes tin cu paga pa nan tuma nos bolo, come esaki, y kisas parti cu nos tur. Esaki yama bo voto sagrado cu abo y nos a laga goberna y dirigi un pais. Es mas, ta bay tin hende sabi cu un setup ken por y lo goberna. Tur politico ta purba score punto.
Den e ultimo eleccion, a bini un coalicion. Den mi opinion – danki Dios – pero no ehemplar. Analisa bon kende y con a pone e carteranan riba un wega di schaak. Por ehempel, ta duna un minister tres cartera pa score mas punto cu esun cu tin un cartera of cartera impopular. Naturalmente tin un desekilibrio si duna otro mas pa score y crea un percepcion comosifuera e minister di tres cartera a traha bon. Normalmente ta e departamentonan di gobierno ta traha pa minister, no e minister mes. Por ehemplo, Aruba Tourism Authority ta esun cu ta yuda den turismo of e minister? Puntra bo mes con e marketing pa bo kere ta tuma luga.
Desde comienso tur hende sa cu MEP ta pronk cu integridad (e idea a nace di otro partido) a bay goberna cu dede largo studiante di AVP – O. O. POR ta y tabata un lapilapi cu hopi placa pa cumpra hende. E no tabata un partido sostenibel, pero no tabata por otro.
A baha gobierno di e forma aki diripiente pa score zetels di POR. Kier mandato absoluto cual mi (y nos) ta contra. Venezuela y China tambe ta purba goberna nan so.
E patronchi di historia ta cu AVP y MEP, den e di dos gobierno a y ta bira golos y goberna malo. Dus pakico keha despues atrobe?
Enfin, pa algun, ni si MEP trata bo malo, MEP bo ta keda pa motibo di custumber. Ami ta basa mi experticio, experiencia y prueba cu MEP no ta Betico ni Nel mas. Of e ta ainda Betico y Nel pa motibo di nostalgia? Tampoco AVP ta famia Eman di antes mas.
Mi a yega di vota solamente MEP. Pero no mas. Otro partido tambe a cuminsa di cero mescos cu MEP y AVP a yega di ta inexistente. Djis imagina bo mes un dia un gobierno sin MEP y sin AVP. Tur hende lo conta y mas transparencia lo tin.
Mi ta haci un yamada extenso pa pensa bon prome cu vota. Bo tin hopi chens di lamenta mañan. Historia a demostra esaki den pasado. Kico abo tin di perde, di purba e hendenan cu no ta basila bo, gaña bo, hunga politica, etc. manera Raiz, PPA, etc. (cu excepcion di POR). Mi ta haci un yamada extenso pa nos tur bini hunto cu mas nos crea swing voters cu ta sali di MEP y AVP. No rabia cu AVP y kere ta MEP bo mester ta of vice versa. Ban haci e otro partidonan grandi cu zetels, unda no ta un gobierno so di MEP y AVP tin. Pasobra esaki lo crea un sorto di mi ta yuda esunnan cu a vota pa mi so. Hopi peligroso pa pone tur e webonan den un macutu so.
Awor si nan mester bo voto. No vota pa un number, letter, un cantica, of un bril. Abo mes por wak bon y bo cartera y pan ariba mesa tin mas balor. Vota sin partido Ping, sin partido Pong. Nan ta dal e bala mescos. Nos no kier tende e mesun storianan di lamento despues.
