Riba diadomingo 5 di mei a yega riba e vuelo di Wingo for di Bogota, Minister Xiomara Maduro. Maduro tabata ausente y a perde varios reunion importante pa nos pais, caminda cu e lider di gabinete, mr. Evelyn Wever-Croes a hay’e ta “val in” mirando cu Maduro a dicidi di bay cu vakantie.
Por lo menos riba rednan social, a tuma nota cu Maduro a atende un evento di conservatorio di Aruba na Riohacha, Colombia. E evento mes a tuma luga riba 2 di mei ultimo. E evento a carga e nomber di ” La Guajira en el Gran Caribe Dialogos sobre Aruba.” Ora a topa cu Maduro na su yegada na aeropuerto, el a conta cu ta vakantie el a bay. Awo, sea el a converti su vakantie den un biahe di trabou pa atende e evento of di bon intencion a perde algun dia su vakantie pa atende asunto di trabou.
Ora a acerca e minister pa puntr’e riba su viahe, su prome reaccion tabata: “ta parce cu bo no tin noticia pa duna”. E minister no tabata contento cu precensia di 24ora.com na aeropuerto. A splica e minister cu ta na su luga pa duna un splicacion, dicon a biaha mientras tabatin reunion importante tumando luga relaciona cu presupuesto di Aruba.
E minister a contesta bisando cu: “no tabatin nada riba reunion di presupuesto, no bin cu co’i kens”. Ta obvio cu a gara Minister Maduro ta gaña, mirando cu su propio hefe, mr. Evelyn Wever-Croes a publica un potret hunto cu consehero di Minister Maduro y director di Departamento di Finansa, bisando cu a cuminsa cu preparacionnan pa entrega presupuesto di pais Aruba na tempo. For di fuente den Cocolishi, ta sigura cu e reunion a tuma luga hasta den e propio oficina di Minister Xiomara Maduro mientras e tabata cu vakantie na Colombia.
Maduro prome cu a subi e Lincoln cu pueblo ta paga p’e por core cu ne, a expresa cu e ta sinti cu 24ora.com ta “stalk e”, di un forma masha rabia a subi auto y su chauffeur a hib’e cas. Pues no obstante cu ta trata aki di biahe priva, a haci uzo di servicio di gobierno pa pasa via sala VIP na aeropuerto y cu chauffeur pa busc’e pa bah’e na cas.
