Na e momento aki y pa hopi tempo mas cu ta bini nos mester di hopi sabiduria den tur cos, na prome lugar tur Famia tin cu compronde cu bida sin Dios ta un bida sin Speransa, pasobra bo por tin placa y tur otro cos cu ta facilta bo bida, pero si bo no busca sabiduria di Dios, lo bo confronta hopi problema.
Sin mete nos mes cu politica, e aña tin 12 partido ta lucha cu otro pa wak ken por gana eleccion, pero sin sabiduria di Dios e no ta bay, nos ta wak cada ken cu programma , cada ken cu Proyecto, pero no tin un hende na mundo cu no tin mester di sabiduria di Dios.
Sabiduria ta essencial, den tur cos especialmente sabiduria di Dios , pasobra tin dos tipo di sabiduria esun terenal, cual uno ta contene egoismo, vengansa,envidia amargo,y asina gaña contra e berdad, esey ta sabiduria natural y diabolico,pasobra caminda ta existi envidia y egoismo tin desordo y tur sorto di cos malo. ( Santiago of Jacobo 3 vers 13-17)
Y den e tipo di sabiduria aki hopi hende ta move , y nan ta kere cu nan ta sabi ora nan por kibra, destrui,papia malo di otro, y cu esey mustra nan grandesa .
Ta dificilmente den un cas di Famia, e pareha ta biba ta rebaha otro, atake verbal tur dia, hipocrecia, y manipulacion, te ora nan yega asina lew na violencia domestico y nan ta pretende di ta sabi , pero e fruta di nan bobedad, bo ta mire den nan yiunan.
Pasobra semper ora esnan cu ta na cabes, ninga Dios, y haci cosnan riba nan mes forsa, cual semper ta bay encontra di e palabra di Dios, e yiunan lo cosecha, mescos si bo ta goberna sin sabiduria di Dios, e pueblo ta cosecha. No tene berguensa di pidi Dios Sabiduria , pasobra ningun hende na mundo no sa tur cos.
Pesey sabiduria di Dios ta mas cu importante,cu tur cos den Famia y den gobernacion,pasobra sabiduria di Dios,ta wordo reconoce pa e siguiente factornan.
E ta puru, pacifico, suave, rasonabel, yen di misericordia, bon fruta, imparcial, sin hipocrecia, y e simia cual su fruta ta husticia, ta wordo sembra den paz ,door di esnan cu ta haci paz. ( Santiago 3 vers 17-18)
Awor si bo no ta nota esey ta visible of e ta wordo aplica den bo cas of den bo organisacion , ta tempo pa pidi Dios yuda bo cu sabiduria, pasobra sin sabiduria , lo bo keda ricibi mesun resultado constante mente.
Rey Salomon a pidi Dios, Sabiduria, e no apidi Dios cabez di su contrincante nan,pero e a pidi Dios Sabiduria, pa e maneha un pais den cual e no tabata sa nada, ni con ta drenta ni con ta sali.
Tin hopi hende cu hopi vision, pero bo a pone bo vision dilanti di Dios y pidie yuda bo cune, no ta tur vision ta di Dios, pero hende ta cana cu nan propio vision y despues cu e cos no resulta, nan ta culpa otro hende.
Salomon tabata e rey di mas sabi te dia di awe, y a lanta su pais cu Sabiduria di Dios, y abo tambe como Mayor por lanta bo Famia cu Sabiduria di Dios.
Sabiduria ta obtenibel pa tur esnan cu kier dobla nan rudia dilanti di Dios, e ta exigi tempo pa Dios, pero e ta algo personal pa cada ken , no ta existi comicion di sabiduria, ta bo mes tin cu buske dilanti di Dios.
Mirando tur locual ta sosode y ta bay sosode riba nos isla , nos ta roga tur mayor pa busca Saburia di Dios, pa bo bida , bo cas y bo famia.
Sinceramente,
Pastor Marcel Balootje.
