Durante un encuentro na Cas di Cultura riba diahuebs 2 di mei 2024, Directie Ouderenzaken a organisa un workshop di nutricion y movecion pa adultonan mayor, dirigi specificamente na casnan di cuido. E evento a brinda e personal di casnan di cuido informacion pa mehora e bienestar di nan cliente.
Oradornan di Healthy Lifestyle Center, Fundacion Movimento ta Bida y coki local a elabora ariba cambionan chikito cu por tin un impacto grandi ariba nos salud. Chef Moisés Ramirez a duna sugerencianan pa un dieta mas saludabel, entre otro, evita come fruta pa desayuno y introduci awa cu infusion di fruta of menta pa asina curasha hidratacion.
Isabel Struve y Lyanne Maduro di Healthy Lifestyle Center a enfatisa e importancia di haci cuminda saludabel atractivo. Nan a ofrece adaptacionnan practico pa textura di cuminda pa acomoda adultonan mayor cu ta perde forsa den boca, manera berdura gesteam. Tambe a recomenda pa cumpra berdura di freezer cual ainda ta nutritivo y ta wanta pa un periodo mas largo. Heathy Lifestyle Center a termina nan presentacion dunando un splicacion con pa lesa etiket di cuminda, pa wak e porcentahe di sodium, esta salo, y sucu cu ta den e producto.
Fundacion Movimento ta Bida a enfoca ariba e rol critico di actividad fisico na cualkier edad. Nan a haci un demostracion di ehercicio accesibel cu por haci hunto cu adulto mayor, pa esunnan ariba pia como tambe esunnan cu problemanan di mobilidad. Ehercicio fisico diario ta vital pa mantene forsa y yuda cu salud mental. Nan tips practico pa integra ehercicio mental den rutina diario door di, entro otro, crucigrama, y otro weganan cu ta rekeri pa pensa.
Minister Arends ta felicita Keila Helder y Giannina Angela hunto cu Directie Ouderenzaken pa nan ehecucion excepcional den promove bida saludabel pa nos adultonan mayor. E tayer no solamente a informa pero tambe a inspira un cambio positivo cerca tur esunnan presente.
