Diasabra e prome modulo di corector di Papiamento a finalisa y tur e cursistanan a logra nan certificado. Pa tres luna largo e cursistanan a siña e diferente regla- y gramaticanan di Papiamento.
Glenda Reiziger, president di Fundacion Corector di Papiamento, a expresa cu e docentenan di Papiamento a comenta cu e curso a bay hopi bon. E participantenan, e cursistanan, tabata entusiasma cu e modulo. E miembronan di e fundacion kier p’e cursistanan sigui p’e di dos modulo.
Esey tabata e meta di e organisacion cu e fundacion a haci. E idea tabata pa mas hende haci bon uzo di Papiamento y skirbi corectamente.
Ann Angela, cursista, a haya cu e curso a bay hopi bon mes. Aunke e ta papia Papiamento y ta convenci cu e ta papi’e bon, den e curso aki el a siña cu hopi cos e ta haci robes incluso den su estilo di skirbi.
E ta corda cu tempo el a regresa Aruba, el a bay traha na Diario. Aki Angela tabata skirbi Papiamento di otro forma. E tabata convenci cu loke e tabata haci tabata bon. Durante e curso aki, Angela a bin siña otro regla con en realidad mester skirbie. Un ehempel cu el a duna ta e constante uzo di e letra ‘z.’
Solange Tchong, cursista, a expresa cu el a experencia e les uno fructifero y bon. El a siña hopi. E ta di pensamento cu Fundacion Corector di Papiamento a haci su esfuerso pa duna e cursistanan e modulo uno hopi interesante. Durante e lesnan e cursistanan a haya hopi enfasis riba e habilidad di scucha como papia. Esaki ta duna e cursistanan e bon instrumentonan p’asina nan por aplica esey den nan bida diario, pero tambe den diferente profesion.
E grupo participante tabata basta grandi y e tabata algo ‘great’ pa mira. E grupo tabata consisti di persona di diferente sector di Aruba cu a participa n’e curso di Papiamento. Tchong ta kere cu cada profesional den nan area por a haya e oportunidad pa siña mas durante e curso aki.
