Tur locual aproba riba mundo y cu ta rechasa pa Dios, ta envano mundo ta aproba, pasobra nos ta keda manera un tata bobo cu ta duna su yiu autoridad di haci locual cu e kier na cas, pero e sa masha bon cu su yiu no por yega ningun caminda cu e estilo di bida ey.
Duna hende autoridad pa bay contra e palabra di Dios, ta nifica pone condena riba bida di hende, y ta esey Dios kier a evita y ta p’esey el a duna Su Unico Yiu, pa ken cu kere den dj’E no bay perdi, m’a tin bida eterno.
Dios ta purba di tur manera pa saca hende for di engaño di diabel, Dios no kier pa ningun hende bay perdi. E palabra di Dios ta bisa den Juan 3:36: “Esun cu kere den e yiu tin bida eterno, esun cu no obedece e Yiu lo no mira bida, ma e furia di Dios ta keda riba dje.”
No tin ningun hues riba mundo, cu por cambia palabra di Dios, pasobra hende por haci locual cu nan kier aki na mundo, pero nos Dios ta santo, y Su Palabra ta pa semper, y Su palabra no ta cambia.
Cerca Dios no tin asunto di casacion, pasobra E ta goberna pa semper.
Dicon Dios no ta cambia? Pasobra Cristo Hesus ta nos salbador y nos hues, e lo husga tur esunnan cu no kere y cu no a haya ta necesario pa reconece Dios. (Romanonan 1:28-32).
Corda bon cu tur hende a peca y ta falta e gracia di Dios, pesey Dios manda su Unico Yiu, pa duna tur hende e oportunidad pa yega na salbacion pa medio di Hesus Cristo.
Awo ora nos ta pone Dios un banda y kier haci nos mesun cos, nos lo cay bao di huicio di Dios, pasobra palabra di Dios ta bisa den 2 Pedro 2:4: Pasobra di Dios no a spaar e angelnan ora nan peca, ma a tira nan den fierno y a condena nan na pos di scuridad.
Den Isaias 33:22 ta para skirbi: “Señor ta nos hues, Señor ta nos dunado di Ley, Señor ta nos rey, E lo salba nos.
Awendia tin masha hopi hende sabi, den cos di mundo y hopi ta kere cu sabiduria di mundo por pasa riba palabra di Dios, pero esey ta um engaño satanico.
Ora nos kier complace cu hende y bay contra e palabra di Dios, nos no ta amigo, ni tampoco consehero di e persona, pero nos ta un piedra di trompica pa e persona, esey ta nifica cu pa motibo cu nos a duna e persona libertad pa inmoralidad, e persona lo cay bao di condenacion.
Pero e palabra di Dios ta bisa nos, cu ora Cristo Hesus bin e lo manda su angelnan y nan lo recoge tur piedra di trompica y esunnan cu ta haci desigualdad y tira nan den forno di candela (Mateo 13:41).
E falta di temor di Dios a aumenta, e rechaso di e palabra di Dios ta manifesta grandemente, e orguyo y arogancia ta hincando hende den caminda hopi scur, no ta tempo pa haci wega mas.
Ta tempo pa aleha for di tur locual cu tin holo di maldad, no ta tempo di reuni cu hende cu ta aparenta manera e palabra ta bisa den 2 Timoteo 3:5: “Cu tin apariencia di ta religioso berde, ma cu ta nega su poder, evita e sorto di hendenan aki.”
Pa Dios cada alma tin mas balor cu politica, salbacion a bin pa nos tur.
Sinceramente, Pastoor Marcel Balootje
