Partido MAS a expresa su preocupacion p’e falta di claridad riba varios tema clave, specialmente relaciona cu SKOA y e werksternan. Drs. Marisol Tromp, lider di fraccion di MAS, a indica cu nan tin un tempo caba ta pidi aclaracion riba e debe significativo cu SKOA tin cu impuesto y si e debe aki lo resolve. Fuera di esey, el a menciona cu e Prome Minister mr. Evelyn Wever-Croes, a firma un carta cu no tabata den su cartera y cu parce a desencadena problema financiero p’e werksternan, sin cu tabatin contesta cla di parti di gobierno.
E Minister di Enseñansa, Endy Croes, t’e responsabel pa atende e problemanan aki, pero te cu aworaki no a ofrece informacion concreto. Tromp a splica cu MAS tabatin un reunion parlamentario cu Minister Croes dos aña pasa pa discuti e temanan aki, pero ainda no sa si SKOA a sali for di e impasse financiero cu e tabata aden. E falta di contesta a haci cu fraccion di MAS a pidi e Prome Minister p’e aparece dilanti Parlamento, pero esaki a nenga, indicando cu e tema tabata cay den man di Endy Croes.
N’e situacion aki, fraccion di MAS ta considerando presenta un mocion for di un angulo nobo pa obtene e atencion necesario riba e asuntonan aki. Parlamentario Marisol Tromp y su colega Aquannette Gunn a bin ta pidi contesta, pero te aworaki gobierno no a brinda e claridad cu tin mester.
Partido MAS tambe ta preocupa p’e informenan di maltrato di mucha na Scol Dornasol. Marisol Tromp a indica cu nan a haci diferente pregunta n’e Minister di Enseñansa riba e tema aki, pero e tabata desvia di duna contesta. Na luga di atende directamente e preocupacionnan riba e bienestar di e muchanan, e Minister parce di a enfoca riba otro aspecto, lagando hopi pregunta sin contesta.
E falta di transparencia y e falta di responsabilidad di parti di gobierno, ta afectando e confiansa publico. MAS lo sigui pone presion pa haya contesta cla y concreto, specialmente ora cu ta trata di proteha derecho di mucha y garantisa e maneho adecua di e institucionnan educativo y di e werksternan. E postura firme di e partido ta refleha e urgencia di atende cu e preocupacionnan aki y e necesidad pa gobierno duna cuenta.
