Un siman a pasa y ainda famia Hoevertsz no a haya un solucion despues cu e cas di FCCA cu nan tabata biba aden a kima. Awe e ta haci un apelacion pasobra, e no ta preocupa cu su mes pero pa su tres yiunan chikito.
Por corda ainda cu riba diadomingo, 28 di april, den oranan di atardi a manda diferente unidad bomberil na un adres na Sabana Basora. Na yegada a topa cu un cas ful na candela. Tabata e cas di famia Hoevertsz, kendenan a perde nan hogar y tur nan pertenencianan den practicamente 15 minuut di tempo.
“Nos a perde tur cos. Mi kier wak ken por yuda nos. Mi no ta worry pa mi, pero mi tin tres yiu chikito. Mi kier haya un cas. Ta un siman caba cu nos no tin un dak fiho. Mi tin hopi duele di mira mi yiunan asina. Mi ta bibando fastioso den auto pasobra no tin un luga fiho,” el a conta.
Na e cas cu a kima tabata biba cinco persona cu awo no tin nada. E tata preocupa ta conta cu berdad nan ta haya cuminda, pero nan problema ta un cas. Mester di un luga di biba pasobra e tin tres yiu chikito cu ta bay scol.
E mes a bay diferente apartamento, pero ta dificil. Sea nan no ta acepta mucha of ora tin mucha, e prijs ta bira hopi halto, y no ta pagabel p’e. “E ta poco fastioso. Nos no por wanta e cos aki mas, di keda den auto henter dia. Ta hopi urgente pa nos tin un dak riba nos cabes. Nos no mester placa pero un dak pa mi yiunan por drumi trankil y bay scol normal.”
Mirando e instancianan cu el a pasa, e ta sinti cu na final niun hende kier yuda nan sali di e situacion. “Realmente nos no tin nada. Mester cuminsa completamente di nobo. Mi ta un yiu di tera preocupa oa mi yiunan cu ta den e situacion aki, door di e candela.”
Franklin a conta cu e ta hopi cansa y su yiunan tambe. E mes tin shete dia sin por drumi drechi, preocupa cu e situacion. “Mi ta kere cu mi yiunan tambe ta sinti fastioso den e situacion aki.”
E tin placa pa huur algo, pero e problema cu tur cos ta demasiado caro.
Pa mas informacion por tuma contacto cu ne na: 5661125.
