Sindicato di Polis Aruba (S.P.A.) a yama un reunion di urgencia awe mainta 10:00AM na e veld band’i Renaissance Convention Center. E reunion aki tabata pa motibo cu e situacion no ta pintando bon. Gobierno no ta papiando e berdad cu ambtenaarnan, ta hungando cu sentimento di pueblo gañando cu Polis no kier entrega. Jose Dirksz, Presidente di S.P.A., a bisa cu Polisnan ta dispuesto pa entrega.
E manera con Gobierno kier corta den nan salario no ta corecto y tin un ley firma pa Gobernador cu ta hancra nan salario. Gobierno ta trapa riba nan derecho y kier pinta tur cos nechi, pero esey no ta e caso! Polis ta frontliners di cual rond mundo ta defende nan, esta Nursenan y Polisnan. Rond mundo frontliners ta haya extra toelage durante crisis, pero na Aruba ta corta salario di frontliners.
E sindicato ta haya esaki algo increibel y ta puntra unda ta bayendo. Tin cu stop di gaña pueblo cu polis no ta entrega, nan kier haci esey pero no na e forma cu gobierno ta bin cu ne. Segun Dirksz, nan ta compronde cu Hulanda kier baha e payroll di pais Aruba cual ta hopi pisa, pero Polis no por yuda cu esey. Tur esey tin di haber cu tur combinacion anterior unda cu nan a bay scol pa bira Polis y no a haya nan trabou zomaar, segun Dirksz.
Nan a corda Ministernan cu nan no a pone borchi pa haya 7mil florin di salario pa luna y no por yuda di esey. Pero no ta husto cu nan tin di bay carga e consecuencia di mal maneho, p’esey no ta acepta esey. Segun e sindicalista, nan tin e trabou na curason y tur ta dispuesto pa ta presente na e reunion. Nan tin trabou na prome luga. El a sigui bisa cu criminalidad ta subiendo y nan no por tapa esaki. Ta bringando pa proteha Aruba aunke cu ta hayando sota for di Gobierno.
Cu e realidad aki riba mesa, e Polisnan a opta pa cana bay Bestuurskantoor pa mustra nan mal contento. Ey a topa cu Minister mr. Andin Bikker cu a sali for di Conseho di Minister pa atende cu e Polisnan. Nan a bisa e mandatario cu nan tin algun punto di preocupacion, entre otro e reconocimiento como frontliner, tambe e forma con ta kita 5% di nan salario ta pone cu ta baha nan pensioen y otro beneficionan. Tambe kier mira si por elimina e decision cu e entrega ta te december y no manera awo cu ta mustra cu e lo bay te den futuro.
A pidi Minister Andin Bikker pa pone e cambionan riba papel, pero e mandatario a pidi pa dune un chens pa presenta e peticion den Conseho di Minister. A pidi pa dun’e te cu 2:00pm pa por contesta e preguntanan y demandanan haci dor di e Polisnan afilia na sindicato SPA.
