E diferente parokianan a cuminsa diamars cu nan servicionan religioso, teniendo cuenta semper cu distanciamento social y reglanan di higiena. No tur servicio ta bay mesora manera antes, segun Pastoor Andres, Vicario Episcopal di Aruba, a duna di conoce durante un conferencia di prensa di Gobierno dialuna merdia.
Manera ta conoci, Iglesia y Tempelnan ta den e grupo di Nivel 2 pa habri nan portanan riba dialuna, 18 di mei. Den cuadro di esaki Pastoor Andres di Savaneta a duna un splicacion con e Iglesianan Catolico ta bay funciona di awo en adelante.
Inmediatamente cu nan a haya e informacion di Gobierno, a haya e decreto tambe for di Obispado cu ta permiti nan cuminsa brinda servicio religioso atrobe. Pastoor Andres a informa cu na entrada di tur misa tin hand sanitizer, pa uza na entrada y salida. El a sigura fielnan cu despues di cada servicio, ta percura pa haci limpiesa den e misa.
E distancia social ta haci cu e cantidad di asientonan disponibel ta limita. A marca riba tur e bankinan unda cu por sinta. Tin persona cu lo guia e fielnan unda nan por sinta. Famia por sinta hunto y sigur muchanan tambe por acudi na misa. Banda di e espacio, cada misa tin e area di coro, cu lo por brinda espacio pa algun hende sinta.
Pa motibo di higiena, na entrada di misa lo no tin e awa bendita y no ta permiti pa duna man ora di duna otro paz. Por ricibi e Santo Comunion solamente den man. Dependiendo e grandura di misa, lo pasa na e bankinan pa duna e fielnan esaki.
Nan ta haci un apelacion na personanan malo, pa miho keda cas y sigui e transmisionnan religioso di e diferente parokianan cu lo sigui riba Facebook. Den siman e servicionan lo ta limita. Servicionan di Formacion tambe ta sigui y ta reanuda e servicio di sirbishi na hospital y na cas atrobe.
Preparacionnan pa bautismo tambe ta sigui, pero den gruponan mas chikito cu lo nifica cu tin mas fecha pa bautismo. Tambe el a bisa cu mayoria di Iglesia no ta cla ainda pa tene servicio di entiero. A discuti esaki den reunion di clero y a keda constata cu mayoria misa no ta cla pa esaki. Un servicio asina den misa ta trece hopi hende, y no por sigura e parti di distancia social y higiena. Asina cu e parokianan ta cla pa esaki, lo informa e fielnan.
