Pandemia a dal economia di mundo henter, e ta parce un plataforma di maldad, caminda tin hende kier bira mas rico, mientras cu otro ta concentra riba poder y maldad, y otro ta dirigi nan mes riba manipulacion.
Prome cu e vacuna a keda cla, tur pais na mundo tabata anhela un vacuna, p’asina nos por biba un bida normal, cu trabao, biahamento, y tur otro forma pa lanta economia, y hasta nos enseñansa por a sigui den su normalidad, pero awor cu varios marca di vacuna ta cla, nos ta tende cu no ta obligatorio pa tuma e vacuna.
Dios spaar nos, pasobra ta mustra un biaha mas cu hende no tin e solucion. Locual si por pasa, ta cu ora mundo henter mira cu nan no por haci nada, ta declara e virus, como un griep. Malaria, dengue, zika, den cual tur hende mester cuida nan curpa.
Pero mientras tanto den bo cas y bo famia, wak bon, habri wowo como mayor, pasobra mescos cu mundo economico a sufri gran golpi, e Baho Mundo tambe a haya sla formal, pasobra e movecion cu tabatin antes no t’ey mas, y asina nan ta inventa tur tipo di cos pa haci negoshi, y gara e hubentud.
Ora nos tende e tipo di biento cu ta supla na Europa , Merca y Latino America, nos tin cu lanta muraya di oracion pa nos famia, pasobra nos yiunan tambe ta vulnerabel.
Y e malbado a pone prijs riba cabes di mucha, pasobra e ta na altura di e necesidad cu tin den cas, pasobra ora mayor no por alcansa pone pan completo riba mesa, bo ta haya tin yiu ta rebeldia, tin cu orea duro, tin cu kier yuda, y no sa con, y tin cu tin caracter zwak cu ta acepta tur cos pa motibo di necesidad.
E plan di diabel ta pa sclavisa nos hubentud, na droga, manipulacion, traha barata, sex, ladronicia, wega di placa, relacion perverso, (Romanos 1:21-27), mula local, cobrado di baho mundo, y hasta sicario local, pasobra tin hopi arma ta circula riba e isla aki.
Y baho mundo su prijs a subi, awor no ta regala telefon mas, ni tampoco tablet, of cadena diki di oro pero ta emplea hobennan dunando scooter y auto, pa asina nan por garantisa cu nan negoshi ta completo, y ora e hoben kier stop di traha, e ta wordo menasa, cu hopi chens di perde su bida.
Te ainda nos tin un realidad, pa cual mayor no por cera su wowo, pasobra e ta pasando den necesidad: Si bo yiu di 14 aña tin un scooter bo mester ta na altura for di unda el a hay’e , pasobra ningun banco ta financia un mucha di 14 aña. Si bo yiu muhe tin un auto ta core y e no tin trabao, no acepta cu ta auto di su guy, pasobra por resulta cu tanto e como su guy ta meti, y ta trahando pa baho mundo.
E cosnan aki ta delicado, pero ta un realidad den cual nos ta biba, y cu nos mester halsa nos Oracion na Dios, y pidi Dios pa proteha nos famia. E pandemia aki lo pasa, pero nos famia lo keda pa semper.
Nos tur ta pasando den tempo dificil, pero no laga nos necesidad, derota nos integridad, cambia nos caracter, y haci nos actua manera hende cu a perde berguensa di tur cos, djis pa yega na placa.
Balor. Moral, y Respet, keto bay ta herment pa bienestar Familiar pa Husticia den cas y pa Integridad.
Locual bo sembra bo ta cosecha, pero cada cos cu bo por preveni (Efesios 6:4) lo ta di gran bendicion pa bo mes como mayor y pa henter bo famia.
Cubri bo cas y bo famia bao di e sanger di Hesus, pidi Dios warda bo Famia, e situacion no ta facil pero cu Fe den Dios , nos lo sali pa dilanti.
