Di un caminda mester saca e suma necesario pa construi y mantene e operacion di un planta moderno di purificacion di awa sushi. E decision te awa ta cu lo pone esaki riba e bishitante. Prome Minister mr. Evelyn Wever Croes no por a splica exactamente con e formula ta, esta e porcentahe.
Solamente a splica cuanto un bishitante ta bay paga, ta depende di e grandura di e camber. Cada tamaño di un camber di un tarifa y uno mas grandi ta un porcentahe mas halto cu un camber chikito.
E cobransa aki lo drenta na vigor, asina cu e ley di privatisacion drenta na vigor. El a referi na e tantisimo discusionnan cu tabatin riba e miho forma pa yega na e fondonan necesario. “Mester a tuma un decision si ta bay pidi pueblo di Aruba paga un belasting extra, of ta bay pidi e turista paga pa e RWZI.”
Na final no por a pone riba pueblo ya cu “a caba di introduci e BBO na frontera y a bin cu diferente ahustenan, pa cual awo no ta e momento pa pidi pueblo di Aruba un biaha mas pa yuda cu esaki. P’esey a dicidi cu lo pone riba e sector hotelero of turistico.
Na e momentonan aki, den seno di gobierno mes lo no por a yega na e suma necesario pa construi un RWZI nobo. E decision no por ta pa e keda den man di gobierno. Normanan financiero ta prohibi pa presta placa pa un proyecto di e indole aki. E normanan tambe ta bisa cu semper mester tin un surplus di un porciento. Loke cu tin riba dje, por uz’e. Tur loke por a haci, a haci, esta patch, pero no mester di esey mas. Mester di un planta nobo.
Diamars mainta tin un reunion di parlamento riba e tema aki unda ministernan concerni lo ta presente.
