E candidato y consehero di partido RAIZ Carlos Guiamo a reacciona hopi lihe riba e comentario di Prome Minister mr. Evelyn Wever-Croes. E mandatario a bisa cu no ta parlamentario pero Hoge Raad tin ultimo palabra den e tema di matrimonio di mesun sexo.
E comentario aki a hala atencion hopi lihe, mirando cu diaranson awo (8 di mei) Parlamento di Aruba mester trata e concepto di ley di matrimonio di mesun sexo. Por nota cu den e comentario, cu e pagina di RAIZ a “like” tambe, ta mustra e mandatario con por ta posibel cu a bay Hoge Raad pasobra corte of hues a sinta riba stoel di e legislador y awo ta bisa net lo contrario.
Den su publicacion el a bisa: “Aruba mester warda riba decision di Hoge Raad pa trata ley di matrimonio civil entre pareha di mesun sexo?”
E ta bisa cu na su opinion, ta bon pa Parlamento di Aruba trata e ley sin warda riba Hoge Raad y pa diferente motibo e ta bisa esey.
Aki ta cita loke e mes a pone den su publicacion:
· Considerando riba ki punto exactamente Hoge Raad lo tuma un decision, y e contenido di e proposicion di ley, por conclui cu tratamento di e ley den Parlamento prome cu Hoge Raad dicidi riba casacion, no lo stroba e proceso legislativo di Aruba.
· Parlamento di Aruba tin e tarea y ta mantene e autoridad pa trata y dicidi riba ley. No ta necesario pa warda riba un instancia di Hulanda pa Parlamento di Aruba haci su trabou y trata e proposicion di ley cu tin riba mesa. Tur e documentonan relaciona cu e proposicion di ley ta entrega na parlamento na october 2023.
· Gobierno di Aruba a bay den casacion hustamente paso hues lo a sinta riba stoel di legislador (= Gobierno + Parlamento). Ta contradictorio pa awo bisa cu toch ta warda riba hues pa dicidi pa parlamento, na luga di tuma e responsabilidad di tuma un decision riba un ley como representante di Pueblo. Sconde tras di Hoge Raad pa no tuma un propio decision basa riba propio motivacion, no ta cuadra cu e tarea di Parlamento y Gobierno di Aruba.
Gobierno di su banda a laga sa cu tratamento di e ley ta den man di parlamento, y cu si parlamento aproba e ley, Gobierno lo respeta esey y ratifica (bekrachtig) e ley.
“Den mi opinion, lo ta un señal y mensahe hopi positivo si Aruba su propio representantenan den parlamento percura pa e reconocemento real di igualdad entre pareha di diferente sexo y pareha di mesun sexo. Esaki lo tin su balor agrega pa aceptacion den nos comunidad, compara cu si matrimonio civil entre pareha di mesun sexo wordo realisa (forsa) por medio di caso den corte entama contra Aruba su Gobierno.”
Mester bisa cu den cuadro di e reunion di diaranson, MEP a yama un reunion cu su miembresia pa diamars anochi y esaki lo por tin resultado interesante.
