Nos mester ta agradecido na Dios cu awe nos ta pertenece na Hulanda, un di e paisnan mas rico den mundo. Imagina boso si nos no ta pertenece na Hulanda kico lo ta di nos den e pandemia aki.
En berdad nos a logra nos Status Aparte, pero tur partido, politiconan cu a goberna nos durante 45 aña di Status Aparte a laga nos pais financieramente den un ruina completo, mientras cu nan si por a gosa di tur privilegionan y enrikece nan mes, nan famia y amigonan.
Kico nos a descubri den e pandemia aki un pais den un estado di pobreza desastroso, tanto Gobierno mes como su hendenan. Durante 45 aña ningun gobierno tabata sa di traha dam, warda awa, esta percura pa Aruba cu tur su rikesanan cu segun politiconan tradicional a bisa cu e Status Aparte a trece cu e, tin un reserva pa mantene cabes riba awa. A insulta Hulanda, a entrega condecoracion, a menasa cu independencia, loke ta biba pa semper den cierto politiconan. A yama Hulanda pa colonisado, pero danki na Hulanda nos pais por a sobrevivi te cu ainda. Ban spera cu e Gobierno nobo cu lo ser eligi na maart proximo na Hulanda lo sigui cu e mesun intencion aki.
Hulanda cu ta bon na altura cu durante añanan, despues di Status Aparte cu ta deroche di placa a tuma luga door di tur politico, a fia Aruba placa, pero cu cierto condicionnan. Condicionnan cu a mara Aruba na man y pia. Aruba mester aproba y firma e dos rijkswetnan, entre nan e organo di reforma COHO, cu ta duna Hulanda tur autoridad pa tin un control completo ariba e maneho riba tur tereno den nos pais. Pa 7 aña Aruba practicamente ta un GEMEENTE di Hulanda.
September lo keda demostra cu pueblo lo sigui apoya partidonan tradicional cu a laga un desaster pa loke ta gobernacion, un Aruba pober, sin placa, cu hendenan pober, pero politiconan rico / miyonario. Corda cu ta cu placa fia for di Hulanda politiconan por sigui cobra nan pension miyonario y e aña’ki atrobe garantisa nan un overbruggingstoelage miyonario. Esaki ta yama traha pa pueblo?
Gradici Hulanda cu awe Aruba ainda ta hala rosea.
