Elton Barbour, manager di e departamento di benta pa e mercado Europeo di Aruba Tourism Authority (ATA), ta drenta den e directiva di e Stichting BMVG (Bevordering Minder Validen Golf). E nombramento aki ta sali for di un cooperacion anterior cu Elton, na nomber di Aruba, a establece den cuadro di e responsabilidad corporativo y pa yega na un grupo specificamente importante pa nos One Happy Island.
Elton Barbour ta un golfista apasiona y na edad di diestres aña, na su isla natal, a dal su prome bala. Desde e tempo ey e ta un fanatico ferviente di e deporte en cuestion. Elton, kende na 2011 a drenta den servicio di ATA como gerente di benta Europa, ta responsabel primordialmente pa actividadnan di benta y mercadeo riba e mercado Hulandes y Belga. Dentro di e organisacion Elton ta responsabel tambe pa establece proyectonan di golf na gran escala cu e obhetivo principal di yega na gruponan di gran potencial den e mundo di golf, mirando cu esaki pa Aruba, como un destinacion premium, ta di suma importancia.
Riba iniciativa di Elton den e ultimo añanan a establece varios partnership cu patrocinadonan hunto cu BMVG pa no solamente yega na e base, pero tambe a traves di responsabilidad social corporativo, sostene y extende e meta di BMVG. Den cuadro di esaki, na 2017, Aruba Tourism Authority y BMVG a lansa un proyecto piloto unda cu bou guia di Elton, a organisa un torneo di golf pa personanan cu limitacion.
“Ademas di promove mi isla, golf ta mi pasion di mas grandi. Mi ta hunga golf desde cu mi ta un adolescente y nunca mi por a laga esaki los. Ora cu mi a cuminsa traha na ATA y wak e cambio for di turismo di masa pa concentra ariba e turismo di calidad, mi a wak esaki como un oportunidad pa integra mi pasion den mi trabou y haci uzo di un tremendo oportunidad pa pone Aruba den un spotlight riba escala mundial cerca un grupo specifico. Esaki no solamente a trece mas popularidad y reservacionnan di calidad pa Aruba, pero tambe door cu nos a cera conoci cu BMVG y cu mi tabata por a haci uzo di mi pasion pa un causa social importante. Mi tabata por a experiencia di cerca con hopi impacto un limitacion tin cerca un tanta cu ta na cama ya casi pa 40 aña. Esaki ta e motibo tambe pa kico e trabou cu BMVG ta un eye opener! Pa medio di golf, BMVG ta demostra cu’n limitacion no mester ta un barera y cu personanan cu limitacion tambe por practica un deporte na nivel superior. Mi tin hopi gana di traha cu e demas miembronan pa asina haci deporte di golf accesibel pa personanan cu limitacion”, segun Elton Barbour a finalisa bisando.
