No ta temporada di yobida pa Aruba sufri molester di awa. Pero si e situacion di problema riba rioolwaterzuiveringsinstallatie (RWZI) sigui, pronto e isla lo sufri un inundacion pero di otro tipo di awa. Uno cu no ta nada agradabel pa economia di e isla.
Y e situacion ta preocupante y nada higienico si mira e tanki na Zeewijk a bay over, awa di riool ta sali riba caya, etc. Tur esaki pa motibo cu a cera e planta na Parkietenbos pa haci algun trabou eynan.
Tur e problema di rioolering menciona, segun e mandatario, ta bisa door di e problema di RWZI cu ta den mal estado. Na e planta ey ta produci e slib cu di un forma of otro mester kima.
E problema a empeora despues di un veredicto den corte, den un caso inicia door di un habitante di Parkietenbos. E decision ey a encera cu no por uza e incinerator. “Por bisa cu door di e caso di e habitante, a mara e incinerator na candal.” El a causa cu e sushi cu si ta sigui wordo produci. Desde cu e persona aki a cuminsa e caso den corte y a haya e veredicto ey di corte, hendenan no a stop di bay baño na Aruba. Tur hende a sigui uza baño y haci nan necesidadnan. Un caminda esakinan mester bay y el a cuminsa pega e operacionnan.”
E situacion ariba menciona a trece un efecto di domino, cu awo ta presiona e planta na Zeewijk. Riba esaki e mandatario a bisa cu su colega Ursell Arends ta encarga cu procesamento di sushi y el a sigura su hefe prome minister cu e ta trahando riba e problema. “Mi sa cu e tin su prioridad.”
E mandatario a manera cuestiona e decision di hues ora cu el a bisa cu mester cera of stop e incinerator di traha y si gobierno kier “por kima den aire liber”. Y a agrega “honestamente mi no ta compronde un evaluacion asina, pasobra mi no ta compronde con un habitante lo prefera pa cera un incinerator cu ta kima cera, cu no ta emiti nada den aire, …. pero bo ta contento cu por bay kima den aire liber” Y esaki ta e dilema cu Minister Ursel Arends tin pa atende cu ne.
Si hues cambia su decision y bisa cu e incinerator por funciona, mesora e problema cu RWZI di Parkientenbos y Zeewijk ta soluciona. Pero si hues keda riba e punto di bista cu no por cende e incinerator, minister Arends forsamente ta hay’e ta busca un luga pa bay kima den aire liber.”Mi ta spera esey no ta e caso.”
