Diabierna ultimo corte a trata un caso hopi serio cu a laga consecuencia cu a afecta e victima pa resto di su bida. E acusado na final a haya un castigo, pero e daño cu el a causa ta irreversibel.
Ta trata aki di e homber Dyron Bislick di 42 aña. E acusacion contra dje ta maltrato cometi riba 21 di september 2023 contra e homber F.R. E prome acusacion ta cu el a dal y scop un persona; complice di maltrato pisa; complice di intento di maltrato pisa y violencia publico.
E victima mes no a acudi na corte pa motibo cu e ta sinti su mes afecta ainda pa loke cu a pasa y e no ta recupera completamente. El a manda un demanda pa daño di cincuenta mil florin. Lamentablemente e ley di demanda durante di un caso penal ta exigi pa e persona ta presente pa por haci e demanda. De lo contrario, e mester haci su demanda via di un caso civil.
Algun siman atras e pia di morocho di e acusado aki tabata den corte caba, y a declar’e culpabel di purba mata su tata. El a maltrat’e pisa cu un baranca di piedra. E tata mester a pasa den diferente operacion y mester a mand’e Colombia pa yud’e cu e lesion cu el a haya na su wowo.
Awo ta Dyron a hay’e den corte y pa un caso di violencia tambe. Tur loke cu a bini den corte ta mustra un contradiccion den declaracionnan, unda cu ta parce cu e ta trata di scapa e ruman.
Riba pregunta di hues si Myron tabata cu ne e anochi di e sucedido, Dyron a bisa cu e tin no menos cu 19 aña sin papia cu su ruman homber. Pero e victima den un declaracion a bisa cu el a mira e ruman ey presente, cu cabey largo.
KICO A PASA
E echo a tuma luga na San Nicolas den oranan di marduga. Tin un diferencia di opinion tambe den e parti di kico of con e echo a tuma luga. E victima ta bisa cu el a pidi Dyron tira bista pa su auto, mientras cu el a bay den un bar.
Segun e acusado, e version ariba menciona no ta berdad. Mas bien, den palabranan di Dyron, e problema a cuminsa pasobra F.R. a cuminsa tira palabra. Pues e tabata esun cu a cuminsa busca problema. “Mi a perde cabes ora cu el a keda tira palabra y mi a dal’e algun mokete.” Un amigo di e acusado a cay aden y e tambe a parti poco sla. Y seguidamente un grupo pasando eybanda, a mira loke ta pasando y tambe a hinca nan mes den e pelea. Pues tur contra e homber FR, si mester kere e palabranan di e acusado Dyron.
El a keda insisti cu ta mokete so el a tira riba FR. Pues no a hinca dede den su wowo (nan) of a uza un obheto skerpi, manera e homber a declara.
E victima mes a conta cu e tabata hungando billiard cu un primo den e bar. El a sali solamente pa haci fabor na un di e muhenan, y busca cuminda cu el a pidi.
Na su regreso, el a topa cu Dyron, kende a ofrece pa cuida e auto p’e y el a pag’e 10 florin. Ta ora cu el bolbe pafo, a topa cu un Dyron para den un postura di bringa, hunto cu un homber cabey largo. Hasta Dyron a pidi un grupo pa yud’e batie. Na final, el a logra subi su auto pa bay cas.
A consecuencia di e slanan, el a cuminsa sinti masha hopi dolor y a bay IMSan, unda a dun’e solamente paracetamol. E dolor a bira asina insoportabel, pa cual su casa a dicidi di yama nan dokter di cas, cu bis’e acudi na su oficina mesora. Y berdad, a constata cu e wowonan tabata hincha, pero di un forma straño y a mand’e cu urgencia pa un dokter di wowo.
Despues di un estudio, a constata cu e tin scheur den tur dos wowo. A inform’e cu mester oper’e di biaha. E specialista a splica cu e tipo di lesion ta mustra cu e lo por a haya un sla duro den su wowo of a hinca un obheto skerpi cu a laga e marcanan ey atras.
Tambe tin rapport di dokter di SVb cu ta menciona cu ta bisa cu a rasca cu huña den su wowonan. Y a consecuencia di esaki, e lesion na e wowo banda drechi tabata hopi mas serio. Y oficialmente el a keda ciego di e wowo ey.
Aunke cu e acusado ta nenga, a combersa cu su ruman homber Myron, kende den su prome declaracion a bisa cu e tabata na e sitio. El a admiti di a dal e homber y despues un otro grupo di casi 10 persona a sigui maltrata FR. Pero den corte e acusado ta nenga, pasobra e tin casi 20 aña sin papia cu e ruman. E victima sinembargo tambe a bisa cu e ruman ey, cu tin cabey largo, tabata presente.
FISCAL
E representante di Ministerio Publico a haya cu por declara e homber aki culpabel. A uza como prueba, relato di e diferente dokternan, ademas di declaracion di e denunciante. Tur e profesionalnan a bisa cu FR a perde bista na su wowo drechi.
Un lesion cu a laga un efecto pa resto di bida di e victima. Algo cu nada por haci mas. A tene cuenta cu ta prome biaha cu e acusado aki ta hay’e envolvi den un delito di e indole aki. Na final, e demanda tabata 12 luna di cual 3 luna ta condicional y dos aña di prueba.
Hues no tabatin mester di tempo pa pa pensa. El a haya tur informacion necesario durante tratamento pa cual a cera e tratamento y dicta sentencia di inmediato.
“E ta proba,” hues a bisa e acusado. “Hunto cu otronan bo a maltrata FR y a hinca dede den su wowonan. Pa e motibo aki, bo ta complice den e delito cometi.” Ta trata aki di un situacion hopi serio y a bisa e acusado, no ta importante kende a hinca dede, pero e echo cometi, unda cu e victima a keda ciego di un banda di wowo.
El a bay di acuerdo cu e castigo exigi door di fiscal. Esaki ta nifica cu awo e mester sinta nuebe luna.
