Durante e ultimo añanan, a experiencia hopi brownout/blackout y ta ripara cu tin un falta di mehoracion unda cu nos infrastructura ta lucha pa cumpli cu e demanda pa suministro y distribucion di coriente.
E falta di capacidad necesario como e prevision pa anticipa e necesidadnan den futuro. Mas aleu, por mira tambe e desaroyonan nobo na caminda cual lo añadi peso na un sistema cu ya caba ta sobrecarga. Vocero di WEB Aruba NV, Asja Dongen, a splica cu infrastructura di distribucion ta cay bou di NV Elmar. Pero pa loke ta WEB, hustamente a bin cu e proyecto di Recip 4, pa por amplia e capacidad. Pero cu tur e pronosticonan di crecemento di turismo, aumento di Airbnb y tambe e aumento di temperatura, esaki ta un aumento grandi den demanda di coriente.
Mas aleu, Dongen a splica cu actualmente e capacidad maximo di e motornan ta 150MW. Pero esey ta bay subi si tin crecemento den turismo y economia. Esey, WEB lo mester bay anticipa riba esey. P’esey ta papia di ampliacion di energia sostenibel, ampliacion di energia di solo, di biento. Pero si esey tampoco ta cumpli cu e demanda, lo mester cuminsa pensa den direccion di ampliacion di e planta. Pero esaki ta rekeri cooperacion pa por bin cu proyecto nobo y nan tempo. Pero e mas principal ta inversion.
INVERSION
Ta evidente cu ta rekeri un inversion significante pa revisa y fortifica nos infrastructura pa futuro. Pregunta ta keda si WEB ta suficientemente solido riba tereno financiero pa soporta e demanda creciente. Segun Dongen, e strategia di WEB ta cu ta incorpora reservanan pa haci inversion di termino cortico y largo. Esaki ta algo cu semper t’ey.
