Pa hoga su mesun yiu: Tata na Ubbena a haya shete aña di castigo

1068

Corte di Drenthe a dicidi duna Paul den B. di cuarenta aña un castigo di shete aña di prison, pa mata su yiu di tres aña. Aña pasa na december a haya e mucha homber den Noord-Willemskanaal cerca di Ubbena y dos siman despues el a fayece. Hues a opina cu den B. a haci tiki pa salba su yiu. Tambe e homber tin di paga su ex pareha un indemnisacion di 21.500 euro.

Tambe ta castiga e homber pa e hecho cu el a kita e mucha for di esun cu tabatin e custodia legal di e menor. Despues cu el a bay cu su yiu, no por a localis’e ya cu el a paga su celular. Na diferente ocasion den B. a ataca su ex pareha, mandando mensahe indesea via via descripcionnan di “transferencia bancario pa placa di alimentacion”.

Paul den B. ta bisa cu e sucedido di dia 19 di december 2019 tabata un accidente fatal y cu e mucha a slip ora e tabata orina. Corte, sinembargo, ta acusa e tata di a hiba su yiu na un luga scur y cerca di awa y no a want’e.

Ora e mucha a cay den awa, e homber no a pidi yudansa, no a bula na awa pa salb’e y ta bisa di a comporta di un manera notabel ora el a yama centro di emergencia. Servicionan di emergencia a rescata e yiu di awa y resucit’e. E mucha a muri dia 31 di december. E accionnan di den B. a causa sufrimento ireparabel na e mama. Despues di morto di e yiu, a scucha e combersacion di den B. y ta mustra di “tabata mas preocupa pa cuminsa un famia nobo cu su pareha nobo cu dolor p’e morto di su yiu of di sinti su mes culpabel.”