Arubahuis recientemente a organisa e evento ‘Ban Topa’ cual ta un encuentro pa comparti cu studiantenan e preocupacionnan cu tin den Reino tocante nan estudio y tambe nan bida. Na cuminsamento di aña a cuminsa cu e iniciativa aki. Presente tabata Joselin Croes, kende ta Director di Arubahuis.
E prome sesion tabata na Groningen na unda a haci un ‘brainstorm sessie’ partiendo e studiantenan den grupo y nan ta haci pregunta tocante comunicacion cu e Gabinete, ki evento nan ta desea di mira organisa, y kico ta nan retonan prome cu a bay studia na Hulanda, tambe con lo por hacie atractivo pa nan por bolbe Aruba pa traha.
E ta un preocupacion grandi, segun Croes, pasobra solamente un 10% di studiante ta bin Aruba ora caba di studia. Esaki ta trece cu ne un asina yama ‘Brain drain’ sigur ora cu nos tin problema di embehecimento.
Despues tin un parti social unda tin un borrel brindando chens pa e participantenan combersa cu otro, hiba charla, y comparti tocante loke nan ta pensa ta sosodiendo na Gabinete y nan propio preocupacionnan.
“E ta un encuentro caminda nos ta haya informacion for di studiantenan cual ta importante p’e Gabinete pa por mehora nos servicionan tambe.”
VIVIENDA TA KEDA UN PROBLEMA
Croes recientemente a caba di participa den e conferencia di minister di OCW, cu e tabata tin na islanan Aruba y Corsou hunto cu e Strategic Education Alliance kende a invita trinta studiante di Saba, Sint Eustatius, Sint Maarten y islanan ABC pa bay Corsou pa participa den e sesion di trabao aki. Nan a vocifera practicamente mescos loke e studiantenan a trece dilanti na ‘Ban Topa’, esta cu vivienda ta keda un problema, nan no ta haya cas of e ta hopi caro. “Nos sa cu e ta un problema, nos tin algun proyecto piloto andando.”
Discriminacion, segun Croes, ta algo cu nan ta mira hopi di nos studiantenan ta enfrenta tambe, no solamente cu nan coleganan como studiante, pero tambe di docente y sistema, cu ta algo alarmante. Esaki ta trece preocupacion di soledad y falta di cas.
Tin hopi studiante cu kier haya mas informacion riba e sistema di impuesto na Hulanda. Nan ta haya nan mes confronta cu cuenta di impuesto cu no tabata sa cu mester a paga, hopi no conoce e sistema di impuesto di Hulanda.
Trabao tambe ta otro factor cu ainda ta e puntonan di mas importante hunto cu presupuesta pa e studiantenan. Nan mester di ayudo con pa traha un presupuesto pa nan por maneha nan placa pa por paga tur cos prome cu fin di luna yega. Esey den lineanan grandi generalmente ta loke cu e studiantenan a pone como nan puntonan di mas importante. “Mi ta kere nan ta cuadra cu locual nos a tende tambe durante reunionnan y encuentro cu minister di OCW.”
E siguiente bishita lo ta Utrecht y Amsterdam cual lo tuma luga den di dos kwartaal. E ta bay bira na fin di mei of juni, y e siguiente lo bira na Breda y Arnhem. Den e ultimo kwartaal lo bay pa Maastricht y henter e area den vecindario.
