Na Arubahuis recientemente tabata tin un encuentro entre minister- y studiantenan den loke tabata e programa ‘Ban Topa’ unda cu a bini hunto pa dialoga riba diferente punto di preocupacion y mas. Un encuentro cu sigur tabata hopi informativo y necesario pa motibo cu hopi studiante semper ta den buskeda di mas informacion cu nan mester pa facilita nan proceso di estudio na Hulanda y pa despues cu nan termina.
Marilynn Hermans ta un studiante na Hulanda haciendo su estudio di Political Science y Public Administration.
Marilynn a participa den e encuentro aki y ta haya hopi bon di por tin e oportunidad aki pa haci pregunta y haya contesta cu ta desea bek. E mes a puntra tocante e asunto di atrae studiante bek pa Aruba, unda cu hopi di e vacatura kisas no tin e estudio den e posicion eynan. E la haya como contesta cu nan ta den proceso di drecha esey y den futuro lo wak cambio.
“Mi ta hay’e nice cu nos por haci pregunta y nos ta haya contesta.” Marilynn ta studiando algo cu tin hopi scarsedad na Aruba pasobra no tin hopi hoben cu por ehempel kier bay den politica. Ora cu el a scoge esaki, ya caba e tabatin e pensamento pa bay bek Aruba pasobra e kier mehora sector publico, y esey ta su meta. “Nos ta na caminda pa esey,” e ta expresa.
‘WINTER DEPRESSIE’
Nathan Perez ta un otro studiante, actualmente den su prome aña na Den Haags Hogeschool pa cu opleiding di Management & Organisation Track. Nathan a haya e encuentro aki hopi positivo pasobra tabata tin ministernan di Aruba cu a presenta y nan a haya oportunidad pa presenta nan preocupacionnan cu nan tin como studiante bibando na Hulanda. “En principio, e tabata un encuentro necesario y ohala nan por organis’e mas biaha tambe pa e studiantenan Rubiano of cu ta bini den Caribe,” segun Nathan. E ta bisa cu den su caso personalmente, y di otro studiante cu e conoce di cerca, e reto di mas grandi ta vivienda. E ta algo cu ta keda bini como, tambe e parti di discriminacion di docentenan of di otro studiante na Hulanda.
E ‘Winter Depressie’ ta algo cu hopi no ta papia di dje pero esey tambe tin, segun Nathan, y danki Dios ora bo ta studiante di Aruba bo ta haya consulta di bo mentor y cosnan asina. “Mi ta spera manera minister a bisa awe cu si por bay na sistema di antes unda bo tin un mentor durante bo cuater añanan di estudio, en bes di tin un mentor pa un solo aña, manera cu e ta awor.”
NO LO BOLBE ARUBA DI BIAHA
Nathan ta haya cu e pregunta riba su pensamento pa bolbe Aruba pa traha, ta tiki dificil pa contesta na momentonan aki. E motibo ta cu e no tin un aña ainda na Hulanda.
Pero, si e mester contesta awo di biaha, e lo duna un contesta cu mayoria di studiante lo duna. Nan lo no bolbe Aruba mesora despues di finalisa nan estudio. Segun e ta bisa, di loke el a tuma nota di dje, na Hulanda tin hopi mas oportunidad pa crece den trabao ora bo caba di studia y otro factor. Cas ta keda cas, pero si por structura miho cierto problema cu ta andando aworaki na Aruba cu ta na beneficio di e studiantenan, ta un cantidad grandi lo kier bay biba bek despues di nan estudio.
