Likides fondo di SVb ta wanta te fin aña

E crisis di coronavirus ta afecta Banco di Seguro Social (SVb) cu ta e instancia cu ta maneha e fondonan di pensioen. E situacion ta mes serio cu esun di otro instancia of negoshinan na Aruba. E evaluacion haci ta mustra cu likides di e fondo ta wanta te cu fin di aña.

Un delegacion di SVb presidi pa e director ir. Edwin Jacobs tabata den Parlamento awe pa suministra informacion relaciona cu fondo di AOV (maneha pa SVb) y cual ta e pronosticonan.

Likides fondo di SVb ta wanta te fin aña

Likides fondo di SVb ta wanta te fin aña. Click link pa mas https://24ora.news/3hX9V5k

Posted by 24ora on Tuesday, September 22, 2020

SVb tabata invitado di e comision di asuntonan economico di Parlamento pa duna un presentacion di e estado di e fondo di AOV. A mustra riba e proyeccionnan prome cu Covid-19, con hopi e reserva lo a wanta, y awo a base di Covid-19 a traha dos escenario , y a mustra kico ta e efectonan di Covid riba e reservanan di SVb y proyeccion a corto plaso di e fondonan di likides di e Seguro aki.

E proyeccion haci ta mustra cu e likides di SVb ta alcansa final di aña. Sinembargo, si e situacion economico di Aruba no mehora di forma modera entre januari y juni di 2021, nan ta haya nan mes obliga di haci uzo di un provision di e ley di SVb cu ta bisa cu Gobierno ta para garantia pa e fondonan di SVb. Ta trata di articulo 21, inciso 1 di ley di SVb.

Jacobs a enfatisa cu ta hopi dificil haci proyeccionnan pa corto plaso, ya cu cada rato tin indicadornan nobo cu ta influencia e situacion. P’esey nan a traha cu escenario, esun mas pio pensando cu e prima lo cay cu 10 miyon e proximo lunanan, cu ta nifica cu ta logra yega final di aña. Si e cay menos, ta logra pasa otro aña. “Tur cos ta depende di e desaroyo economico cu na e momentonan aki no tin modelo pa predici esaki. ” Mester trata di baha rapidez di e contagio y pa esaki mester tuma mas medida, cu ta nifica mas restriccion cu ta afecta e desaroyo economico.

Tambe nan a duna un bista general di e plan di subsidio di salario cu nan tabata encarga cu ne, e plan pa e empresanan mediano y chikito.