Den luna di maart como e prome kwartaal di aña a bay hopi bon pa Boneiro. E turismo di Boneiro ta sigui crece y ta mira esey den e cantidad di vuelo cu a aumenta.
Den e lunanan di januari te cu maart nan a surpasa e cantidad di bishitante di stay-over, compara cu aña pasa. A surpasa e cantidad aki tambe si compara e periodo aki cu 2019, esta prome cu e pandemia. Miles Mercera, director di Tourism Corporation Bonaire (TCB), a indica cu nan a mira un crecemento grandi fo’i diferente mercado importante. Aki el a referi n’e mercado di Merca, inclui Canada.
Aña pasa den luna di december nan a conecta cu Canada pa vuelo directo cu WestJet. Door di esaki nan por mira un aumento den e mercado di Merca, pero tambe a mira un ampliacion di diferente aerolinea Mericano cu ta bini for di Atlanta, Miami, Houston cu a añadi vuelo adicional. Tur esey a yuda cu Boneiro a surpasa e cantidad di bishitante compara cu aña pasa.
TCB ta contento cu na maart nan a yega e record di bishitante ricibi, cual ta riba diesocho mil. Normalmente e averahe pa luna ta entre 15.000 y 15.500 turista. Na maart tabatin diesocho mil compara cu diesseis mil di aña pasa y esun di aña 2019.
Esaki ta un aña cu pa prome bes den nan historia a mira un grupo di bishitante den luna di maart. Historicamente esaki no ta p’e luna so, pero compara hasta cu henter aña di cantidad di bishitante. Segun Mercera, nan ta spera cu e luna di april tambe ta asina.
Pa mas lesa TREMPAN.COM.
