A cuminsa busca hende cu tin interes pa drenta e casnan nobo na Kibaima. Segun Edwin Tromp di FCCA, dos aña pasa a cuminsa cu e proyecto aki. Esaki ta conhuntamente cu gobierno y otro entidadnan.
A traha 15 cas na Kibaima. E casnan a keda entrega manera debe ser. FCCA a cuminsa for di cabamento di aña pasa pa invita hendenan, interesadonan pa bin inscribi. A haya riba 100 interesado y for di eynan a bin abao. A screen y a haci tur e partinan ken ta cumpli. E tin su rekerimentonan tambe, segun Tromp. A traha un profiel riba TNO riba esey y por bisa cu ta na bispo pa e hendenan cuminsa drenta nan cas.
A keda cu varios hende cu ta cuadra cu e profiel y ta spera cu for di awo pa dia 1 di Mei, mester por ta asina leu.
Casnan di huur
E casnan aki ta pa huur pa e prome 5 añanan, segun Edwin Tromp.
E feeling
Esaki ta un proyecto cu segun Tromp, ta bon pa haci’e den e sentido caminda cu lo inventarisa hopi situacion y informacion pa loke ta durabilidad. Nan ta bay wak con e biento ta, ki efecto e tin, e suda. Tin hopi salpeter den nos aire. Con ta pone solar panel y ta pone molina. Tur eseynan kier saca afo den e proximo 5 añanan. Si bo ta bay haci un proyecto asina aki, no por contesta awor aki, pasobra tin cu determina con el a bay den 5 aña.
E casnan aki ta keda di FCCA, segun Tromp. El a agrega cu tin hende cu a demostra interes pa cumpra awo. Pero esey no ta e idea. Pero si ta bende ta uno. Of por keda huurnan den e proximo 20 pa 25 aña.
Huur
E huur ta core entre 1300 y 1900 florin. Cada cas ta bin cu algo. Tin cas ta convencional, tin cas ta bin cu cierto ekipo, sensor pa midi cos. Un di nan ta full traha cu un sistema di prefab.
E huurdonan
E hendenan tin cu coopera si tin testnan cu tin cu wordo haci na e casnan. Tin di compronde cu hopi di e testnan ta wordo haci fuera di e casnan. Pero tempo tempo nanta drenta den e casnan. Por ehempel si un sensor daña tin cu cambi’e, Tromp a splica.
Mantencion
FCCA ta responsabel pa e mantencion di e casnan aki. Parti paden, e huurdo tin cu mantene. Pero FCCA ta mantene nan parti pafo, Tromp a comenta por ultimo.
