Apertura eksitoso di reunión importante tokante tsunami

Ku un total di 15 pais presente, e di 13 reunion di e Grupo Intergubernamental ku ta kordiná e sistema di alerta pa tsunami i otro peligernan na kosta pa Karibe i paisnan den serkania awe mainta a inisiá.

Di parti di e Komishon Intergubernamental Oseanográfiko di UNESCO, IOC, e sekretario general sr Cesar Toro i sra. Christa Von Hillebrandt-Andrade, presidente di ICG Caribe a hiba palabra durante e parti ofisial di apertura.

Sr. Albert Martis komo representante permanente di Kòrsou i Sint Maarten pa e Organisashon Mundial di Meteorologia i Minister di Trafiko Transporte i Planifikashon Urbano sra. Zita Jesus – Leito a representá Kòrsou pa medio di un disertashon.

Sra. Marilyn Alcalá – Wallé tabata tei presente no únikamente komo Minister di Enseñansa, Siensia, Kultura i Deporte sino tambe komo presidente di e komishon nashonal na Kòrsou pa UNESCO. Alabes sra. Alcalá-Wallé a representá Promé Minister.

E meta prinsipal di e reunión aki ta pa redusi e impakto ku e tipo di fenómenonan aki por okashoná dor di konsientisá paisnan pa nan tene kuenta ku e peligernan aki ora ta desaroyá nan kosta i tambe stimula training i aktividatnan edukativo tokante e tema. E seshonnan ta sigui e dianan aki te ku djabierné próksimo dia 27 di aprel. Servisio Meteorológiko ta organisánan i nan ta tuma lugá na Santa Barbara Beach and Golf Resort.