E ultimo simannan e negociacionnan entre hospital y sindicato ABV a continua den ambiente normal di negociaion, cual mester tin den e caso aki.
Gerencia di hospital a percura pa nan team negociado ta completo y e negociacionnan a continua den presencia di mediador di gobierno. Mediador di gobierno solamente por duna conseho y yuda guia e proceso y esey ta canando. Di parti di ABV a pone hopi enfasis riba si bo tin tres aña di contrato colectivo en bes di dos, lo bo mester tin un contenido cu ta husto cu bo por bende esaki cu e trahadonan. No ta un tarea facil pa e dirigentenan di ABV pa presenta e resultado di negociacion cu tin casi un aña ta yegando. Den e ultimo reunionnan a palabra, cu di parti di gerencia nan lo tin cu presenta e pakete final na e hunta di supervision, hunta di comisario di hospital, cu tin e ultimo palabra.
Pero a kere tambe cu loke e partidonan a discuti, ta puntonan profundo di cambionan cu e trahaonan ta aspira pa hopi tempo caba pa nan cambia.
Mediador di gobierno, Anselmo Pontilius, a splica cu loke tin pendiente, ta dos sesion mas, cual tabata dia 16 di April y dia 23 di April, pa mira si entre e periodonan cu ta sigui, cu e sindicato por haya e documentonan necesario, garantia cu loke nan a wordo discuti y negosha na mesa, si esey por wordo aproba y cu nan por presenta esaki na nan miembronan.
Ta papiando di un hospital cu casi 1000 trahado, pues ta un proceso basta lento, cu e speransa pa dia 30 di April, pa e prome siman di Mei por keda cla cu nan por firma cu tin un acuerdo pa un periodo di tres aña.
Placa
E puntonan cu ta riba mesa tur di nan ta costa placa. Si papia di bonus, si papia di aumento di salario, mehoracion di entre otro pension, por ehempel prima di pensioen, tanto e trahado tin cu paga, e dunado di trabao ta wordo spera pa paga mas, pa e trahadonan tin un miho resultado di pensioen na final. Tur di nan ta costa placa. Hospital, manera cu nos sa, ta haya un suma di placa anual for di AZV, cu ta na su turno, ta haya e placanan di belasting. Eyriba cada biaha ta un debate tin grandi y den cual e sumanan corespondiente mester tey.
Un di e puntonan serio di parti di sindicato na mesa ta, cu si tin espacio pa entre otro economisa den hospital den e sentido cu bo ta tene cuenta cu bo gastonan operacional.
Ora cu ta deal cu cliente, no ta sin mas ta bay corta. Di parti di sindicato nan ta kere tin espacio pa por mehora riba gastonan cu por tin y cu esaki, ora cu spaar riba e gastonan, e exceso ey por dedica mas fondo na e trahadonan, tanto den beneficio di salario directo, como indirecto.
Esey ta e situacion. Pero sigur ta placa ta e punto principal y hospital, den su maneho ta bisa, ta tanto suma di placa tin pa mehora e condicionnan di trabao pa cada aña. Eseynan ta sumanan cu tin cu haya aprobacion tambe ora cu presenta nan na AZV y e speransa logico ta cu tur partido lo kier yega tambe na un acuerdo di un tempo mas largo cu dos aña, den e caso aki tres aña.
Si por compara cu algun luna atras, e ta riba bon caminda pa termina y tin un trabao pa loke e dirigentenan di ABV tin cu haci, ta di trata di convence e trahadonan y logra haya aprobacion di loke nan a negosha.
Prijskaartje
Hospital ta bisa cu nan tin por lo menos mey miyon florin pa cada aña di CAO. Si totalis’e ta papiando aki di 1.5 miyon. Logico hopi hende ta bisa cu ta hopi placa. Pero na e mesun momento tin cu tene cuenta cu ta papiando aki di 1000 trahado cu un contracto colectivo cu ta aplicabel pe.
No ta solamente e suma di placa aki ta bay na aumento di salario, pero ta purba di parti’e tambe riba otro beneficionan cu a menciona. Un miho seguro, un miho prima di pensioen, cu por duna un miho pensioen na final.
Den e caso aki, e indicacion ta cla si cu den e presupuesto anual den caso di 2019, 2020 y 2021, e sumanan ey ta disponibel. E señal ey tey caba. Ta purba di yega mas tanto posibel con bo por parti e bolo, pa e rason ey yama e suma di placa cu ta disponibel di cada aña cu por tin un contracto colectivo di tres aña.
