Un tema cu presidente di Rainbow Warriors Core Foundation, Milton Ponson a trata t’e ley cu porfin ta bayendo Parlamento pa trata e asunto di BBO na frontera.
E prome cos cu ta resalta t’e conseho di Raad van Advies cu pa prome biaha probablemente den su historia ta manda un advertencia pisa cu e ley aki ta bay haci un desaster cu nos economia aki na Aruba.
Como organisacion di desaroyo sostenibel y derecho humano, ta puntrando kico a pasa cu e dialogo tripartiet na Aruba.
Obviamente gobierno, sindicato y gremio di sector priva, den un sistema di consulta regular mester trata tema cu ta di importancia pa un y tur, entre otro economia, asunto di impuesto, pero tambe asunto di consumidor y asunto general di bienestar pa tur hende, manera AZV, pensioen, servicio social y infrastructura di nos pais, educacion, etc.
A resalta cu desde 2017, ora cu e prome gobierno di Evelyn Wever-Croes a sinta, tur esaki pocopoco a cay na awa. Actualmente por papia di e proceso di dialogo social, esta e dialogo tripartiet tradicional entre sindicato, gremio comercial y gobierno, basicamente a bay den bar’i sushi.
E gobierno di Aruba actual, consistiendo di e partidonan Raiz y MEP, aparentemente ta pensa cu nan por haci kico cu nan kier irespecto e consecuencianan grave pa nos economia, bienestar y pan di cada dia di tur ciudadano y otro hende cu ta biba riba nos pais.
Mester resalta e echo cu no solamente e proceso di tripartiet a caba na nada, pero e nivel di inteligencia manifesta di tanto parlamentario, politico na mando, esta e mandatarionan, pero tambe lider sindical y lider di gremio comercial, cu ultimamente ta laga hopi di desea.
Un ley cu tin actualmente cu tin riba mesa, cu ta di tal embergadura cu lo bay destrui e unico pilar di nos pais Aruba. Y basicamente obstaculisa por completo diversificacion den cualkier otro ramo industrial, mester ta un tema cu mester tin e interes y urgencia absoluto di tur e gremionan concerni.
Pero kico ta mira? Gritamento, lamento Guajiro y voor de rest nada. Nos no a mira ningun gremio, ni sindical, ni comercial produci un rapport, uzando entre otro e conseho di Raad van Advies, cual tabata absolutamente negativo, pero tur otro dato pa mustra cu e maneho di gobierno desde 2017 ta un desaster, na unda contrario na loke gobierno ta bisa, no a baha gasto di personal.
Gobierno a sconde seis aña largo e gastonan di personal cu a aumenta, pasobra den e seis añanan ultimo, a bin casi 60 fundacion nobo acerca, di cual hopi di nan ta riba payroll di gobierno. No riba lista di personal, pero gasto na subsidio y consultant, via Dienst Verlenings Overneenkomst (DVO), cual t’e palabra magico di cual gobierno ta pusha e trabao ambtenaar den sector priva, sea consultant of den sector di sociedad civil, den fundacion.
Basicamente tur e consultantnan y e personal di e fundacionnan aki por ta considera riba payroll di gobierno, pasobra al fin y al cabo, ta placa di belasting ta paga nan gastonan.
Mayoria di e fundacionnan ey, nan gastonan principal, hopi di nan ta 70 pa 80%, cual ta gasto di personal, gasto di salario y pa colmo nan ta uza e mesun normanan salarial cu tin den sector publico.
E pregunta ta ki dia sindicato y gremio comercial ta lanta fo’i soño y bati cu dos man riba mesa bisa “te aki, nos kier mira cifra realistico na unda gobierno a baha gasto.” Loke hopi analista y politico a destaca cu entrada di gobierno, via belasting, a subi.
Gasto di personal di gobierno a subi. Ta Raad van Advies y Algemene Rekenkamer a constata esaki. Te ki dia aki na Aruba ta bay wanta e abuso, mentira y e sed di vengansa, pasobra tur loke a tende cada biaha ora cu gobierno ta purba di hustifica su maneho, ta pa coregi desaster haci door di e gobiernonan anterior di Mike Eman, lubidando cu desde 2001, te cu 2017 dos gobierno absoluto a sinta dos termino largo. Prome MEP y despues AVP.
Tur dos a contribui na aumenta e debe di e pais aki y subi gasto di belasting sin misericordia. Ta na un punto clave aki den nos historia.
Si pa dia prome di juli e ley aki drenta na vigor, ta bay cuminsa e principio di e collapse total di e unico pilar di nos economia y absoluto imposibilidad di diversifica den cualkier otro sector pasobra Aruba simplemente lo a bira demasiado caro pa inverti den cualkier sector industrial nobo.
