Giancarlo Croes, Manager di Departamento di Research na Banco Central Aruba, ta laga sa cu Banco Central Aruba ta orguyoso di por uni su mes na e Encuesta Laboral 2023.
Pa Banco Central e informacion di mercado laboral ta sumamente importante. “Banco Central tin como un di su tareanan pa haci analisis di e economia di Aruba, y mercado laboral ta un parti hopi importante di esey.”
Miho informacion cu Banco Central tin di e mercado laboral lo yuda nan den nan analisis.
Cu miho informacion di e mercado laboral pa haci nan proyeccionnan, esaki lo hisa e calidad di e proyeccionnan, analisis y esey lo yuda pa duna miho conseho, y sigur tuma miho decisionnan riba maneho monetario.
“No solamente Banco Central, pero otro instancianan cu ta traha nan maneho, si nan ta miho informa riba un parti asina importante di nos economia, esey tambe lo yuda hisa e calidad di decisionnan riba maneho.”
