Indice di Prijs di Consumo pa luna di augustus 2023 ta representa un subida di 0.7% compara cu e indice di juli 2023 (106.20). E cambio di e CPI pa e ultimo diesdos (12) lunanan (augustus 2022 te cu augustus 2023) ta 0.5%, cu ta representa un caida di 7.2 punto di porcentahe (ppt) compara cu e periodo corespondiente di aña pasa (7.7%). Esaki ta datonan cu ta resalta den e informe di Oficina Central di Estadistica.
Nan ta informa cu e cifranan disponibel ta mustra cu e promedio anual (ultimo 24 luna) di e tasa di inflacion pa e periodonan di augustus 2021 te cu augustus 2022 y augustus 2022 te cu augustus 2023 ta 4.9%. Un subida di 0.6 ppt compara cu e 4.3% registra den e periodonan di augustus 2020 te cu augustus 2021 y augustus 2021 te cu augustus 2022.
Durante e luna aki, dies (10) di e diesdos (12) sectornan a registra subida di prijs. E subidanan cu tawata tin e mayor efecto riba e CPI a registra pa e sectornan di “Transporte” (1.9%) y “Educacion” (19.3%), causando un efecto di respectivamente, 0.25 y 0.19 ppt.
E subidanan den e demas sectornan a contribui cu un efecto di 0.26 ppt riba e CPI di augustus 2023. E subidanan aki a wordo contraresta parcialmente door di un caida leve den e indice di e sector di “Comunicacion” (-0.1%) cu a contribui cu un efecto di -0.01 ppt riba e CPI di augustus 2023. E caida den sector restante a contribui cu un efecto insignificante riba e CPI di augustus 2023. E subida den e sector di “Transporte” tabata causa principalmente door di un subida di 2.8% den e categoria “Gasto relaciona cu uzo di vehiculo di transporte personal”, causando un efecto di 0.24 ppt.
E aumento den e sector di “Educacion” tabata causa door di subida den e categorianan “Educacion preescolar y basico” (42.9%) y “Educacion secundario” (20.1%), causando un efecto di respectivamente, 0.10 y 0.09 ppt. E caida den e sector di “Comunicacion” a wordo causa door di un caida den e categoria “Ekipo di telefon y fax” (-3.1%), causando un efecto di -0.01 ppt.
Canasta di consumo E canasta di consumo di e CPI ta consisti di 408 bienes y servicionan. Compara cu juli 2023, 47.1% di e bienes y servicionan aki a conoce un aumento di prijs causando un efecto di 1.19 ppt, mientras cu 36.0% ta mustra un caida di prijs, cu a contribui cu un efecto di -0.50 ppt y pa e restante 16.9% no tawata tin cambio den prijs.
Prijsnan di bienes a subi cu 0.8% y a causa un efecto di 0.48 ppt. Prijsnan di servicionan a conoce un subida di 0.5% y a causa un efecto di 0.21 ppt riba CPI di augustus 2023.
