Na DIMAS tin problema cu permiso, unda no kier duna ciudadano permiso. Ciudadano ta cansa di ta trata na un manera diferente. Ariel Lopez ta wardando pa su permiso, pero ta mand’e di cashi pa muraya.
Rosalia Sanchez, ciudadano rabia, a indica cu tur hende sa e caso di Ariel Lopez, cu no ta nada straño na DIMAS. Lopez ta wardando su permiso. E ta casa cu yiu muhe di Sanchez cu ta Hulandes, ta Rubiano y tin un yiu homber di dos aña cu ta Arubiano tambe. Lopez a casa cu e yiu di Sanchez na aki. Sanchez no kier a bay den detaye di loke a pasa cu Lopez.
Lopez a presenta na DIMAS pa puntra riba su permiso, a bis’e cu por neng’e pasobra e tin un deportacion di dos aña den su record. Lopez no a sali fo’i Aruba tempo di e problema. Tres hues di Corsou a bin Aruba y a dun’e su libertad.
“Nan a bisa cu ta calumnia nan a lanta contra dje y kico mas mester haci”, el a bisa. Sanchez kier sa kico mas nan tin di haci, si nan como un ciudadano mester keda persigui, no ta cuenta di persecucion politico. E cos no ta cuenta di politica, no ta cuenta di esaki of esaya, pero e cuenta no ta cu Lopez pero ta cu Rosalia. El a bisa cu e ta papia di parti di Dios y ta gradici cu e tin su famia, cu e tin tur cos.
E no ta haya ta husto cu e como un pashent sobreviviente di cancer, mester ta den un cos asina. El a sigui bisa cu aña pasa dia 22 di november el a hera muri y e tabata na Hulanda. E ta cuestiona e echo cu con nan ta mand’e di cashi pa muraya. E trahado di DIMAS a bisa Lopez cu “e mester bay wak e na Warda Nos Costa.” A informa nan cu Warda Nos Costa no ta migracion, pasobra nan ta mira ken ta sali y drenta. Migracion a bisa nan ta Warda Nos Costa mester bay, Sanchez a haci esey.
E kier pa nan laga na pas su famia. Pero diaranson mainta na Warda Nos Costa a bisa nan cu DIMAS por mira den e sistema cu Lopez no a sali for di Aruba. Nan mester busca un dispensacion cu supuestamente Minister di Husticia mester kita e deportacion cu ta riba Lopez. Sanchez ta cuestiona e echo cu ta biba riba un Aruba den siglo 21 cu te ainda un persona cu no a sali for di e pais, ta aki y tin un deportacion riba dje. E tin un carta firma di deportacion pero e no a sali di Aruba.
Ariel Lopez, cuidadano preocupa, a indica cu e ta pasando un caminda di cruz. Esaki ta algo cu nunca di su bida el a pasa. E ta enfatisa cu e no ta pidi prestamo ni ayudo di persona, pero loke e kier ta su permiso pa traha y sostene su famia. E tin un yiu di dos aña, a casa na Aruba, tin carta di DPL y tur su papelnan. Su yiu tin su fam anota na Censo.
Ta mustra cu ningun di eseynan ta suficiente, pasobra awo ta pidi su persona pa un carta pa kita e deportacion. E ta enfatisa di nunca a sali for di Aruba. E tin cuater aña riba e isla y e no a sali nunca. E solucion ta pa nan dun’e su permiso, cual e ta luchando p’e pa cuater aña.
