Minister Dangui Oduber, encarga cu maneho di Salud Publico riba nos isla, awe mainta a anuncia cu un cantidad di pashent a recupera completamente di e Coronavirus. Pa hopi dia tabatin solamente 1 pashent recupera, cu tabata e prome pashent riba nos isla, procedente di Merca. El a subi na dos y awe a anuncia 12 caso mas pa subi na un total di 14 pashent completamente recupera. Esaki ta un bon noticia, na opinion di Minister Dangui Oduber, cu ta convenci cu e maneho cu ta hibando ta funcionando.
Di otro banda, e cantidad di pashentnan cu a resulta positivo di Coronavirus a subi di 71 pa 74 caso, pues tres caso mas. Si tene cuenta cu tin 14 caso recupera, e ora por papia di 60 caso activo riba nos isla.
Na tur Gobierno a test un total di 954 persona, cu ta mas cu hopi isla den nos region. Tin 395 hende actualmente den cuarentena y tin 2 caso pendiente pa haya resultado ainda di nan. Di tur e testnan haci, 878 a sali negativo. Te awe no tin ningun morto na Aruba, a causa di Coronavirus. Ayera ainda nos tabatin 9 pashent interna den Hospital, di cual 2 tabata den Intensive Care Unit (ICU).
