Margarita Pourier-Henriquez ta verpleegkundige y ta trahando cu e Fundacion Epilepsia desde 2011. E ta duna informacion na scol y tambe haci bishitanan na cas cerca esnan cu por tin epilepsia, pa asina duna informacion completo tocante esaki.
El a comenta cu tempo cu el a cuminsa, el a ripara cu hopi hende no sa nada riba epilepsia. Pero awo poco poco, door cu nan ta bay scol y instancianan y duna informacion, nan ta haya sa un tiki mas kico ta epilepsia y con pa biba cun’e.
Na encuentronan tambe nan ta haya hopi hende ta bin y ta contento cu e fundacion ta duna informacion. Antes no tabata tin ningun informacion cu ta duna na nan.
Purple Day, ta dia 26 di Maart. El a cuminsa na Canada, por medio di un mucha muhe cu tabata tin epilepsia. Na scol, amiganan di e mucha muhe aki tabata lage un banda. Riba un dia e mama di e mucha muhe a bin scol hunto cu e asociacion di epilepsia di Canada, pa asina duna mas informacion na e scol.
Asina aki ta observa e dia aki na otro partinan di mundo, riba dia 10 di Februari. E ta mas tanto un dia pa duna sosten na esnan cu tin epilepsia, pa nan sa cu nan no ta nan so. Tin como 50 miyon di hende na mundo cu ta sufri di epilepsia.
Dia 10 di Februari, tur fundacion di epilepsia ta duna informacion na pueblo, pa nan sa kico ta epilepsia.
For di Merca, el a bay Inglatera, cerca e Reina, pa asina haci mas promocion riba e situacion di salud cu yama epilepsia.
Na Aruba toch awor aki por duna informacion na comunidad pa nan no core bay ora cu un hende haya epilepsia, pero kico nan tin cu haci ora cu un hende haya un atake.
Na scol ta parti foyeto na tur e maestronan. Nan tin informacion special pa e maestronan. For di Hulanda tin buki pa docente y uno pa e muchanan cu tin epilepsia. E aña aki lo bay purba di haya fondo pa por drecha nan foyeto, haci’e mas atractivo y tambe nan carchi cu nan ta duna na esnan cu tin epilepsia, esta un carchi emergencia, pa ora cu nan haya un atake nan sa kico nan por haci.
Pourier a yega di bay un creche, caminda cu un mucha a haya un atake. Un leidster a core bay laga e mucha door di spanto. Te awor aki, nan ta kere cu ta mal spirito ta drenta e mucha of castigo di diabel, etc. Pero esey ta creencianan di antes. Awor aki tin internet y busca informacion kico en realidad ta epilepsia.
Pourier a splica cu epilepsia ta tur caminda. Tin hende ta hay’e door di diferente cos. Por ehempel door di un accidente, unda cu ta haya hopi hende hoben ta hay’e. Hobennan cu ta core brommer sin helm y door di sla na cabes, nan por desaroya epilepsia. Tin hende cu ta cay for di halto. Tin diferente manera por bin haya epilepsia. Pero ta 50 miyon hende na mundo ta calcula cu tin epilepsia.
No ta tur ora cu tin epilepsia, ta haya e trato adecua. Aki na Aruba a topa cu hopi problema, pasobra cu no tin un neurologo pa hendenan cu tin epilepsia.
