Ta para skirbi den e buki di Mikeas capitulo 2 versiculo 1: Ay di esunnan cu ta plania inikidat, cu ta pensa maldad riba nan cama! Ora bira mainta nan ta ehecuta esaki, pasobra ta den poder di nan man pa haci esaki.
Den Salmo 34:21 ta para skirbi: Maldad ta mata e malvado, y esunnan cu ta odia e husto lo wordo condena.
Maldad riba mundo ta aumentando di un forma barbaro, leynan di decencia y respet ta poni un banda y hasta declara anticua, pa asina inmoralidad, bagamunderia y abominacion por haci fiesta.
Demostracion contra Dios y su Palabra ta wordo haci abiertamente, mientras cu adoracion di diabel cada dia ta bira mas visibel, tanto den actitud, echo, bistimento y habito.
Pero nos no por lubida cu esunnan cu ta duna aprobacion na maldad tambe ta wordo conta como malvado (Romanonan 1:32). P’esey e mayornan mester tene bon cuenta den cual direccion nan ta apoya nan yiunan. Si bo yiu ta den habito di inmoralidad, bo mester sigui haci oracion pa Dios por toca su mente y su curason pa e entrega su bida na Cristo Hesus. Y no dun’e bo apoyo pa e bay profundisa su mes mas den scuridad (1 Juan 1:9).
Maske cuanto bo stima un persona, bo no por permiti su maldad of inmoralidad eherce un dominio asina grandi cu bo no por bis’e cu e ta robes. Bo no por sinta mira bagamunderia tuma luga y keda keto djis pa bo keda bon cu hende of keda forma parti di e grupito. Pasobra esun cu tin cu duna cuenta mañan na Dios personalmente ta bo persona.
Den e buki di Daniel capitulo 6, Daniel a demostra cu ni maske nan ofrece un posicion halto, toch e no ta bandona Dios, ni tampoco fria den oracion. Al contratrio el a bira mas constante den presencia di Dios. Aunke e tabata sa cu cueba di leon tabata sper’e, Daniel a permanece den su oracion y servicio na Dios.
Ora un mayor ta stima su yiu e no por apoy’e den ningun clase di actitud cu ta bay contra e palabra di Dios. Pasobra lo tin consecuencia pa tanto mayor como yui.
E malvado cu su cara yen di orguyo, no ta busca Dios. Tur su pensamento ta: No tin Dios (Salmo 10:4).
Pasobra abo no ta un Dios, cu ta hiba gusto den maldad. Maldad no ta biba den bo presencia (Salmo 5:4).
Maske con grandi e amor den famia ta, no ta para skirbi ningun caminda cu famia mester sconde maldad di otro. Nos no por biba un bida hunto sabiendo cu un ta den inmoralidad y nos no ta hala su atencion. Pasobra pa motibo di nos negligencia nos ta bay atras familiar, social, spiritual y hasta nos por haya nos envolvi cu husticia.
Recuerdo di e husto lo ta bendiciona, ma nomber di e malvado lo putri (Proverbionan 10:7).
Dios ta adverti na nos tur lo siguiente:
Esaki mi ta bisa anto y ta afirma hunto cu Señor, pa boso no cana mas, mescos cu e paganonan tambe ta cana den e vanidad di nan mente.
Siendo tapa cu scuridad den nan comprondemento,exclui di e bida di Dios pa motibo di e ignorancia, cu ta den nan, pa motibo di nan dureza di curason. Y nan perdiendo tur gevoel a entrega nan mes na sensualidad pa cu golosidad, nan practica tur clase di impuresa (Efesionan 4:17-19).
Cada biaha cu nos ta like & Share cosnan inmoral, vulgar, negativo y mentira nos ta apoyando maldad den tur sentido.
Sinceramente,
Pastoor Marcel Balootje
