Pa drs. Marisol Tromp, lider di fraccion di MAS, e maniobra haci door di MEP den parlamento riba e proyecto di ley matrimonio di mesun sexo, tabata simplemente un forma pa no duna cara riba e tema.
Despues di hopi controversia a yama e reunion pa trata e proyecto di ley matrimonio di mesun sexo pa diaranson, 8 di mei, 2024., den parlamento. Y aunke cu tur 21 miembro tabata presente e iniciativa aki di un miembro cu ta forma parti di e coalicion, no a pasa. Net net niet, manera ta bisa popularmente.
Pa parlamentario Tromp esaki tabata un wega di partido MEP, orkesta pa e lider mr. Evelyn Wever-Croes. E ta sinti cu e manipulacion a cuminsa prome cu e reunion a cuminsa cu e “dilema” di e presidente di con e votamento of e forma di vota mester ta. “A bin pa kibra reglanan y manipula resultado di e votacion. Door di bini cu cosnan cu no ta den ley. Diripiente despues, ora cu nos a protesta, el a cambia. E ora a nota cu miembronan cu probablemente prome tabata di vota na fabor, despues a dicidi contra.”
Di biaha despues cu e votacion a finalisa den un empate, e Presidente di Parlamento a anuncia cu lo mester bolbe convoca un reunion unda cu e unico punto di agenda ta vota un biaha mas riba e proyecto di ley. “Honestamente, mi no ta mira esaki sosode awo,mientrastanto cu e sentencia den e caso na Corte di Casacion si lo bini. Esey ta e manera, mi ta kere, cu MEP kier evita di duna cara y vota honestamente pa loke nan ta kere aden.”
Na opinion di e lider di MAS, e partido MEP simplemente tin miedo pa fiha nan posicion y lo sinta warda riba e decision Casacion. Prome y durante e reunion e politico a sinti cu e fraccion di MEP tin miedo e posicion cu nan kier tuma. “Nan no kier vota di berdad pa loke nan ta pensa, y hasta inventa formanan pa keda sin vota, pero sinta den sala.”
Tromp a conta cu door di e empate mester bolbe yama un reunion pa e votamento solamente. Pero e mes ta kere cu esaki ta un forma cu MEP a uza pa pospone un tumamento di decision, ya cu sin e formula uza, e ley lo por a pasa.
Segun e otro miembro di MAS, Aguannette Gunn, na inicio “a trata di pasa nos un fastball, pero ora cu nan a ripara cu esey no ta logra a bini cu un sistema cu prolonga e tumamento di decision. “Ironia di bida ta cu nos ta un pais autonomo. E motibo pakico Prome Minister a bay casacion ta pa motibo cu a indica cu hues a sinta riba stoel di parlamento. Y awe cu tabatin e oportunidad pa tuma un decision corecto, hopi na final a cambia. Tabatin algun colega cu den nan disertacion a indica di tabata na fabor di e iniciativa, pero na momento di votacion a cambia.
Segun Aguannette Gunn, henter e asunto aki ta algo tactico, pasobra no ta bay yama e reunion di nobo pa vota y simplemente ta bay warda e veredicto di Hulanda. “Atrobe nan kier pa Hulanda impone algo y haci comosifuera cu nan no tin nada y cu ta Hulanda a impone, cu no a keda otro alternativa cu implementa e ley. Esaki mientras cu e motibo cu a bay casacion ta pasobra a cuestiona a sinta stoel di parlamento. Y awo cu Parlamento di Aruba mester a haci su trabou, sali vota, no a para pa nan pensamento.”
